Қасым-Жомарт Тоқаев Qazaqstan Barysy Grand Slam турнирін тамашалады
АСТАНА. KAZINFORM — Президент Qazaqstan Barysy Grand Slam дзюдодан халықаралық рейтинг турниріне барды. Бұл туралы Ақорданың баспасөз қызметі хабарлады.
Турнирді Мемлекет басшысымен бірге Халықаралық дзюдо федерациясының (IJF) президенті Мариус Визер, Олимпиада чемпионы Елдос Сметов тамашалады.
Биыл бұл бәсекеге әлемнің 46 елінен үздік шыққан 358 спортшы қатысып жатыр.
Қазақстандық дзюдошылар арасынан Ғұсман Қырғызбаев (-66 келі) пен Талғат Орынбасар (-60 келі) күміс, ал Мағжан Шамшадин (-60 келі), Аман Бақытжан (-60 келі), Есет Қуанов (-73 келі) және Абылайхан Жұбаназар (-81 келі) қола жүлде жеңіп алды.
Еске сала кетейік, Астанада осымен Grand Slam әлемдік сериясының жарыстары үшінші мәрте өтіп жатыр.
Айта кетелік Астанадағы турнирде бүгін ел құрамасынан кімдер сайысқа түсетінін жазған едік.
