Президент Словениямен қандай салаларда тың жобаларлар жүзеге асырылатындығын атады
АСТАНА. KAZINFORM – Қазақстан-Словения үкіметаралық комиссияның қызметі жаңа деңгейге көтерілмек. Бұл туралы Ақордада елімізге ресми сапармен келген Словения Президенті Наташа Пирц-Мусармен келіссөздерден кейінгі БАҚ өкілдеріне арналған бірлескен мәлімдеме барысында Мемлекет басшысы Қасым-Жомарт Тоқаев атты.
- Словения – Қазақстанның Еуропа одағындағы сенімді, маңызды серіктесі. Екі елдің қарым-қатынасы достық және өзара сыйластық рухында нығайып келе жатыр. Былтыр Словения астанасы – Любляна қаласында Қазақстан Елшілігінің ашылуы соның айқын дәлелі. Мен мұны ықпалдастығымызды дамыту жолындағы маңызды қадам деп санаймын. Қазақстан екі ел арасындағы достықты одан ары тереңдетуге мүдделі. Сондықтан бұл сапардың мән-маңызы айрықша, - деді Мемлекет басшысы.
Қасым-Жомарт Тоқаев Президент Пирц-Мусар ханыммен мазмұнды әрі жемісті келіссөз жүргізгендігін баса айтты.
- Қазақ-словен ынтымақтастығының аясын кеңейту жолын талқыладық. Нақты келісімдерге қол жеткіздік. Бірлескен мәлімдемені қабылдадық. Сондай-ақ бүгін бірқатар үкіметаралық және мекемеаралық келісім жасалды. Соның ішінде денсаулық сақтау, туризм, білім беру саласына қатысты маңызды құжаттар бар. Бұл келісімдерді тиімді іске асыру арқылы екі елдің ынтымақтастығын жандандыра түсеміз деп сенемін, - деді Президент.
Мемлекет басшысы екіжақты қатынастың өзегі - сауда-экономикалық және инвестициялық байланыстарды арттыруға келіскендіктерін атап өтті.
- Қазір біз фармацевтика, жаңартылатын энергия, инженерия, телекоммуникация саласында маңызды жобалаларды жүзеге асырып жатырмыз. Елімізде осы салаларда 20-ға жуық словен компаниясы табысты жұмыс істеуде. Экономикалық байланыстардың ауқымын одан ары кеңейту маңызды. Осы орайда цифрландыру және инновация, жасыл энергетика, атом өнеркәсібі, денсаулық сақтау, туризм саласында тың жобаларды жүзеге асыруға келістік. Қолда бар мүмкіндікті тиімді пайдалану үшін үкіметаралық комиссияның жұмысын жандандырып, оның қызметін жаңа деңгейге көтеруге шақырдым, - деді Қасым-Жомарт Тоқаев.
Бұған дейін Мемлекет басшысыҚазақстан-Словения бизнес кеңесін құруды ұсынған еді.
