Каспий теңізінің қауіпсіздігін жағалаудағы мемлекеттер өздері қамтамасыз етуі тиіс — Иран елшісі
АСТАНА. KAZINFORM — Каспий теңізіндегі қауіпсіздікті тек жағалаудағы мемлекеттер қамтамасыз етуі тиіс. Бұл туралы Иран Ислам Республикасының Қазақстан Республикасындағы Төтенше және өкілетті елшісі Али Акбар Джоукар мәлімдеді.
Оның айтуынша, Каспий теңізіне шектес барлық мемлекет теңіздегі қауіпсіздікті өздері қамтамасыз ету жөнінде ортақ пікірде.
— Каспий өңірі бұл тұрғыда Парсы шығанағынан ерекшеленеді. Себебі Парсы шығанағында АҚШ-тың қатысуы бар және бұл аймақтағы елдердегі жағдайдың тұрақсыздануына ықпал етеді. Ал Каспий теңізінде жағалаудағы бес мемлекеттің бірлескен күш-жігерінің арқасында теңіздегі қауіпсіздік толық қамтамасыз етіліп отыр, — деді елші.
Сондай-ақ ол Каспий теңізі акваториясында басқа мемлекеттердің әскери қатысуына жол бермеу мәселесінде бес елдің ұстанымы ортақ екенін атап өтті.
Бұған дейін Али Акбар Джокуар Қазақстан үшін қазіргі уақытта ешқандай қауіп-қатер жоқ. Алайда болашақта Орталық Азия аймағы үшін белгілі бір қауіп төнуі мүмкін деген еді.
