Каспийде Қазақстан мен Әзербайжанның әскери теңіз күштері жаттығып жатыр
АҚТАУ. KAZINFORM — «Каспий самалы — 2025» жаттығуы Каспий теңізінің қазақстандық секторында өтіп жатыр. Оған екі елден 300-ге жуық әскери қызметші қатысып жатыр.
Жауынгерлер радиобайланыс жаттығуларымен қатар, бірлескен маневрлар жасап, іздестіру-құтқару жұмыстарын пысықтады. Сонымен қатар, суасты-диверсия, катерлер мен әуе шабуылына қарсы қорғаныс бағытында бірқатар тапсырма орындады.
ҚР Қарулы күштері Әскери-теңіз күштері бас қолбасшысының бірінші орынбасары, бас штаб бастығы бірінші ранг капитаны Қанат Ниязбековтің айтуынша, Каспий теңізіндегі қауіпсіздікті қамтамасыз етуде бірлескен жаттығулардың маңызы зор.
— Жаттығу аясында өзара іс-қимылды күшейту, әскери-теңіз күштері арасындағы байланыс пен үйлесімділікті нығайту, жеке құрамның кәсіби шеберлігін арттыру сынды міндеттер қамтылды. Екі елдің әскери-теңіз күштері тәжірибе алмасып, жалпы жаттығу кезінде 8 эпизод бойынша даярлығын шыңдады. Осылайша халықаралық ынтымақтастықты нығайтып жатырмыз, — дейді бас штаб бастығы Қанат Ниязбеков.
Әскери теңізшілер судағы және әуедегі нысаналарға дәлдеп оқ атып, су бетінде жүзіп жүрген миналарды жою операциясын да сәтті өткізді.
Қазақстан тарапынан жаттығуға «Орал», «Сарыарқа», «Маңғыстау» зымыран-артиллериялық кемелері, жауынгерлік катерлер, гидрографиялық кемелер мен авиация қатысып жатыр. Ал, Әзербайжан әскери-теңіз күштері «G-122», «G-124» күзет кемелері мен «G-129» көмекші кемесін жұмылдырды.
Бұған дейін, Ақтаулық сүңгуірдің теңіз түбін қоқыстан тазалағаны туралы жазған болатынбыз.
