Катонқарағайда екі аланын ертіп бара жатқан ілбіс фототұзаққа түсіп қалды
ӨСКЕМЕН. KAZINFORM – Шығыс Қазақстан облысы Катонқарағай ауданында екі күшігіе ертіп кетіп бара жатқан таутан (ілбістің аналығы) фототұзаққа түсіп қалды.
Екі күшігімен жайбарақат келе жатқан ұрғашы ілбіс Катонқарағай мемлекеттік ұлттық табиғи паркінің орман шаруашылығында фототұзаққа түсіп қалған.
«Айта кетейік, бұған дейін осы жылдың 11 маусымында бұл барыстар фототұзақ объективіне іліккен. Демек, бұл барыстардың ұлттық парк аумағында тұрақтап қалғанын аңғартады», - деп хабарлады ҚР Экология және табиғи ресурстар министрлігі Орман шаруашылығы және жануарлар дүниесі комитетінен.
Ілбісті қазақ халқы ежелден киелі санаған. Ол Қазақстан Республикасының және халықаралық табиғатты қорғау одағының Қызыл кітабына жойылып бара жатқан аң түрі ретінде енгізілген.
Еске салсақ, осыған дейін ШҚО тұрғыны жолда жаралы жатқан Қызыл кітапқа енген құсты құтқарып қалғаны хабарланған.
