Қатты боранға байланысты еліміздің бірқатар республикалық маңызы бар жолдарындағы көлік қозғалысына шектеу қойылды

Бұл туралы бүгін «Қазақавтожол» РМК-ның баспасөз қызметі хабарлады.

Атап айтқанда, кеше таңертең Ақтөбе облысы аумағындағы «Қарабұтақ-Комсомольск» автожолының Комсомольск пен Қостанай облысы шекарасына дейінгі 0-231 шақырымындағы аралықта жолға шығуға тыйым салынды.

Сондай-ақ Қостанай облысында кешеден бері «Қарабұтақ-Қостанай» автожолының Қамысты-Ақтөбе облысы аумағына дейінгі 231-330 шақырымында, «Екатеринбург-Алматы» автожолының 589-729 шақырымында да көлік қозғалысына шектеу қойылды.

Ал Солтүстік Қазақстан облысы аумағындағы «Көкшетау-Рузаевка» автожолының 61-192 шақырымындағы, «Жезқазған-Петропавл» жолының 800-719 шақырымы, «Мамлютка-Қостанай» автожолының 0-180 шақырымындағы жол учаскелері бүгін сағат 09:00-ден бастап ашылды. «Қазақавтожол» РМК-ның арнайы техникалары жолдың тазалығын қамтамасыз ету мақсатында қазіргі кезде аталған жол аралықтарында кезекшілікке шықты.