«Қайрат» элиталық кезеңде алғаш рет жеңіске жетті — футзал
АСТАНА. KAZINFORM — Футзалдан Чемпиондар лигасының элиталық кезеңінде «Қайрат» командасы Загреб қаласында (Хорватия) франциялық «Этуальмен» шеберлік байқасты.

Бұл осыған дейін өз тарихында екі мәрте Чемпиондар лигасын ұтқан алматылық клубтың В тобындағы алғашқы ойыны еді.
Бірінші таймда испаниялық маман Марлон Веласко жаттықтыратын «Қайраттың» (капитаны Біржан Оразов) ойыншылары бірден шабуылға шықты. 2-минутта әдемі ұйымдастырылған шабуылдан кейін Эдсонның пасынан соң Денер Родриго есеп ашты. 9-минутта Эдсонның өзі есепті 2:0-ге жеткізді.
Екінші кезеңде 26-минутта «Этуаль» сапынан Суфиан Эль-Месрар көзге түсті. Дегенмен 31-минутта Жулио Занотто қақырата тепкен доп қақпада тулап жатты — 3:1. 37-минутта «Қайрат» ойыншыларының қателігін Абдессамад Мохаммед пайдаланғанымен, Кевин Арриета қарымта гол соқты — 4:2.
Осылайша, «Қайрат» элиталық кезеңде алғашқы жеңісіне қол жеткізді.
Әр топтан тек жеңімпаз команда ғана жартылай финалға шығатынын ескерсек, алматылықтарға қалған екі ойында да нәтижелі өнер көрсету керек-ақ.
Еске сала кетейік, бұдан бұрын футзалдан Чемпиондар лигасында «Қайрат» пен «Семейдің» элиталық кезеңдегі алғашқы матчтарын өткізетінін жазған болатынбыз.
Футзалдан Чемпиондар лигасында «Семей» элиталық кезеңде ұтылып қалды.