ҚазАқпарат-Анонс: маусымның 15-і мен 21-і аралығындағы оқиғалардың күнтізбесі
ЕЛБАСЫМаусымның 15-16-сы күндері Ресейдің Екатеринбор қаласында Шанхай ынтымақтастық ұйымына мүше елдер басшылары кеңесінің 8-ші отырысы өтеді. ҮКІМЕТМаусымның 15-інде Қорғаныс министрі Даниал Ахметов Сарышағанға сапармен барады. Маусымның 15-інде Ішкі істер және Сыртқы істер министрліктерінде апталық брифингтер өтеді. Маусымның 15-і мен 23-і аралығында Ішкі істер министрлігінің сайтында (www.iim.kz және www.mvd.kz) нашақорлыққа және есірткі бизнесіне қарсы күрес, есірткі қылмыстары үшін жауапкершілікті күшейту мәселелеріне арналған интернет-конференция өтеді. Жұртшылықтың сауалдарынан Ішкі істер вице-министрі Қалмұханбет Нұрмханұлы Қасымов жауап береді. Сауалдар ведомство сайтының «Конференция» айдарында маусымның 15-і мен 23-і аралығында қабылданады, ал вице-министрдің жауаптары маусымның 26-сы күні шығады.
ҚОҒАМЕлімізде 2009 жылғы ақпанның 17-сі мен шілденің 1-і аралығында шағын және орта кәсіпкерлік субъектілерін тексеруге мораторий жарияланды.Маусымның 1-інен бастап тамыздың 15-іне дейін Қазақстан Республикасы Президентінің «Болашақ» халықаралық стипендиясын тағайындау конкурсына қатысу үшін құжаттар қабылданады. Құжаттарды «Халықаралық бағдарламалар орталығы» АҚ Астана және Алматы қалаларында сенбі мен жексенбіден басқа күндері сағат 9.00-ден 17.00-ге қабылдайды. Ескерту: 2009 жылғы маусымның 1-і мен 30-ы аралығында Алматы қаласында тек өз бетімен ынта білдірген үміткерлердің құжаттары қабылданады. Пошта арқылы жіберілген құжаттар қабылданбайды.Қазақстан және әлем Немістің Штутгарт қаласында осы жылғы маусымның 13-і мен 16-сы аралығында Алматының мәдени күндері болады. Шара Қазақстанның Германиядағы жылы ауқымында өтеді. Алматылық делегацияны қала әкімі Ахметжан Есімов басқарып барады. Шара ауқымында екі концерттік бағдарлама және фотоэкспозиция мен сәндік-қолданбалы өнер көрмесі болады.
Маусымның 15-інде Орталық Азия елдері бойынша турне барысында директор ? жарлықшы Доминик Стросс-Кан бастаған Халықаралық Валюталық Қор делегациясының Қазақстанға сапары жоспарлануда. Сапар барысында еліміздің қаржылық институттары өкілдерімен және ресми тұлғалармен бірқатар кездесулер өтпек.Маусымның 15-16-сында Екатеринбургте Шанхай ынтымақтастық ұйымына мүше елдер басшылары Кеңесінің 8-ші отырысы өтеді. ШЫҰ-ға мүше мемлекеттер ба шылары, Ұйымдағы бақылаушы мемлекеттер, төрағалық етуші елдің қонақтары ? Ауғанстан және Түрікменстан, сонымен қатар БҰҰ, ТМД, ҰҚШҰ тұрақты органдары өкілдері қатысатын аталмыш саммит 2008-2009 жылдардағы Ресей төрағалығын қорытындыламақ.СПОРТ Маусымның 7-16-ы күндері Қытайдың Жухай қаласында бокстан Азия чемпионаты өтеді. Дамир Буданбеков жаттықтыратын ел құрамасы соңғы оқу- жаттығу жиынын қазір Гуанжу қаласында өткізіп жатыр. Команда бастығы Қайрат Манашовтың айтуынша, бұл дүбірлі додаға қазақстандық боксшылар толық құрамда қатысады. Онда ел намысын қорғау - Біржан Жақыпов (48 кг), Олжас Сәттібаев (51 кг), Міржан Рақымжанов (54 кг), Мақсат Оспанов (57 кг), Ғани Жайлауов (60 кг), Омар Тәшенев (64 кг), Серік Сәпиев (69 кг), Әділбек Ниязымбетов (75кг), Данияр Елеусінов (81 кг), Василий Левит (91 кг) пен Иван Дычкоға (+91 кг) сеніп тапсырылып отыр.«Астана» велоклубының шабандоздары маусымның 13-і мен 21-і аралығында болатын Швейцариядағы «Tour de Suisse» жарысына қатысады.
АСТАНАМаусымның 15-інде «Дипломат» отелінде академиялық рейтинг саласындағы халықаралық сарапшылар тобының IV конференциясы өтеді. Маусымның 15-інде Ақпараттандыру және байланыс агенттігінде «Ашық әлем» әлеуметтік бағдарламасының 2-ші кезегінің басталуына арналған баспасөз мәслихаты өтеді. Маусымның 15-інде «Риксос» отелінде «Жаһандық дағдарыс және оның қазақстандық экономикаға әсері» тақырыбына арналған «дөңгелек үстел» отырысы өтеді.
Маусымның 15-інде Қазақстан Республикасының Тұңғыш Президентінің Физика-математикалық бағыттағы зияткерлік мектебі порталының таныстырылымы өтеді.
АЛМАТЫ Маусымның 13-і мен 16-сы аралығында Немістің Штутгарт қаласында Алматының мәдени күндері өтуде. Алматылық делегацияны қала әкімі Ахметжан Есімов басқарып барды. Шара ауқымында екі концерттік бағдарлама және фотоэкспозиция мен сәндік-қолданбалы өнер көрмесі болады.Маусымның 15-інде Британ консулдығы кеңсесінде Ұлыбританиядан британдық еріктілердің келуіне арналған брифинг өтеді. Маусымның 17-сі күні сағат 17.00-де Астанадағы Германия Елшілігінде Германия Федеративтік Республикасының Қазақстандағы Төтенше және Өкілетті Елшісі Райнер Ойген Шлагетер виза рәсімдеу амалдарына байланысты мүдделі бұқаралық ақпарат құралдарының сауалдарына жауап береді.
--------------------------------------------------------------------------------------------------
АТАУЛЫ КҮНДЕР. ЕЛЕУЛІ ОҚИҒАЛАР. МАУСЫМНЫҢ 15-І, ДҮЙСЕНБІӘзірбайжан Республикасының Ұлттық мейрамы ? Ұлттық Құтқару күні. Гейдар Әлиевтің билік басына қайта келуі құрметіне орай, ел Парламентінің 1997 жылғы маусымның 27-дегі шешімі бойынша жыл сайын атап өтіледі. Әзірбайжан ? Кавказдың оңтүстік-шығысында орналасқан мемлекет. Солтүстігінде Ресеймен, солтүстік-батысында Грузиямен, оңтүстік-батысында Армения, Түркиямен, оңтүстігінде Иранмен, шығысында Каспий теңізі арқылы Қазақстанмен шектеседі. Астанасы ? Баку қаласы. Ресми тілі ? әзірбайжан тілі. Ақша бірлігі ? манат. Мемлекет басшысы ? Президент. Жоғары атқарушы органы ? Үкімет. Жоғары заң шығарушы органы ? Тұрақты парламент.
Қазақстан Республикасы мен Әзірбайжан Республикасының арасындағы дипломатиялық қарым-қатынас 1992 жылғы тамыздың 27-де орнатылды.ЕСТЕ ҚАЛАР ОҚИҒАЛАР66 жыл бұрын (1943) Петропавл 1-ші жылу энергия орталығы алғашқы киловатт электр энергиясын берді.31 жыл бұрын (1978) Қазақ КСР Министрлер Кеңесінің қаулысымен Қазақ КСР Орман шаруашылығы министрлігі құрылды. Министрлік 1992 жылы ақпанның 7-інде Қазақстан Республикасы Президенті Н.Назарбаевтың Жарлығымен таратылды.16 жыл бұрын (1993) Қазақстан Республикасының Президенті Нұрсұлтан Назарбаевтың Жарлығымен Үндістан Республикасында Қазақстан Елшілігі ашылды.13 жыл бұрын (1996) Абай шығармаларының жинағы Иранда парсы тілінде басылып шықты.8 жыл бұрын (2001) «Шанхай бестігі» Өзбекстанмен толығып, «Шанхай ынтымақтастық ұйымы» құрылды.ЕСІМДЕР105 жыл бұрын (1904-1981) кинорежиссер, оператор, Қазақстанның еңбек сіңірген өнер қайраткері ЗЕККИ Осман Уәлиоллаұлы дүниеге келді.
Ол 1953 жылдан Алматы киностудиясында істеп, хроника секторына жетекшілік жасады. 1957 жылдан операторлықпен бірге режиссерлік қызметпен айналысып, бірқатар деректі фильм қойды. Олардың қатарында «Қара түнек сүрлеуі», «Халық таланттары», «Текке кеткен өмір», «Тұңғиық», «Ертеңгі Алматы», т.б. бар. Сонымен қатар ғылыми-көпшілік таспалар мен бір көркем фильм түсірді. 85 жыл бұрын (1924-1983) ақын, аудармашы АХМЕТОВ Әбдікәрім дүниеге келді.
Қызылорда облысының Қармақшы ауданында туған. Лепсі педагогикалық училищесін, Алматы жоғары партия мектебін, Харьков әскери-медициналық училищесін бітірген. 1943-1950 жылдары әскер қатарында қызмет жасап, Германиядағы кеңестік қарулы күштер сапында, шекара округінде офицерлік қызмет атқарды. Елге оралған соң «Жас алаш», «Егемен Қазақстан», Павлодар облыстық «Қызыл ту» газеттерінде, Қазақстан Жазушылар одағының Шығыс Қазақстан және Семей облыстарындағы бөлімшелерінде, Көркем әдебиет баспасында қызмет етті. Біраз уақыт «Жазушы» баспасының аға редакторы болды.
Шығармалары 1939 жылдан жарық көре бастаған ақынның алғашқы кітабы «Өлеңдер» деген атпен шықты. Оның «Толқындағы өмір», «Салқын самал», «Ашық аспан», «Маржандария», т.б. өлеңдер мен поэмалар жинақтары жарық көрді. Көркем аударма саласында Л.Украинканың, С.Маршактың, Г.Зелинскийдің, В.Федоровтың шығармаларын қазақ тіліне тәржімалады. 1973 жылы қарақалпақ әдебиетінің классигі Бердақ ақынның таңдамалы толғаулары мен дастанын қысқаша жырлап, жеке кітап қылып бастырды.
Бірнеше жауынгерлік-әскери медальмен марапатталған. 60 жыл бұрын (1949) Қазақстан Республикасы Парламенті Сенатының депутаты, Әлеуметтік-мәдени даму комитетінің мүшесі, Тәуелсіз Мемлекеттер Достастығына қатысушы мемлекеттердің Парламентаралық Ассамблеясы Ғылым және білім мәселелері жөніндегі комиссиясының мүшесі, Польша Республикасының Сенатымен, Корея Республикасының Ұлттық Жиналысымен ынтымақтастық тобының мүшесі БАШМАКОВ Анатолий Афанасьевич дүниеге келді.
Солтүстік Қазақстан облысында туған. Петропавл педагогикалық институтын, Целиноград ауыл шаруашылығы институтын бітірген. 1978-1986 жылдары ? Солтүстік Қазақстан облысы Сергеев аудандық партия комитетінің нұсқаушысы, бөлім меңгерушісі. 1986-1988 жылдары ? Солтүстік Қазақстан облыстық партия комитетінің үгіт және насихат бөлімі меңгерушісінің орынбасары. 1988-1991 жылдары ? Петропавл қалалық партия комитетінің хатшысы. 1991-1993 жылдары ? Солтүстік Қазақстан мемлекеттік мүлік жөніндегі аумақтық комитетінің бөлім бастығы, комитет төрағасының орынбасары. 1993-1999 жылдары ? Солтүстік Қазақстан облыстық кеден басқармасы бастығының бірінші орынбасары. 1999-2002 жылдары «Азық-түлік корпорациясы» жабық акционерлік қоғамының Солтүстік Қазақстан облысындағы өкілдігі директорының орынбасары, Петропавл экономикалық колледжінің директоры қызметтерін атқарған. 2002 жылдан бері Қазақстан Республикасы Парламенті Сенатының депутаты.
«Құрмет» орденімен, медальдармен марапатталған.55 жыл бұрын (1954) Қазақстан Республикасының Қорғаныс министрі, экономика ғылымының докторы, Қазақстан Республикасы Минералдық ресурстар академиясының академигі АХМЕТОВ Даниал Кенжетайұлы дүниеге келді.
Павлодар қаласында туған. Павлодар индустриалдық институтын бітірген. Институтты бітіргеннен кейін «Павлодартұрғынүйқұрылыс» тресі үй салу комбинатының шебері, Екібастұз қалалық партия комитетінің нұсқаушысы болып жұмыс істеді. 1987-1991 жылдары ? Екібастұз қалалық атқару комитеті төрағасының орынбасары. 1991-1992 жылдары ? «Екібастұзэнергтұрғынүйөнеркәсіпқұрылыс» тресінің басшысы. 1992-1993 жылдары ? Екібастұз қалалық әкімдігінің басшысы. 1993-1997 жылдары ? Павлодар облыстық әкімдігінің басшысы, әкімі. 1997-1999 жылдары ? Солтүстік Қазақстан облысының әкімі. 1999-2001 жылдары ? ҚР Премьер-Министрінің орынбасары, бірінші орынбасары. 2001-2003 жылдары ? Павлодар облысының әкімі. 2003-2007 жылдары ? Қазақстан Республикасының Премьер-Министрі, Қазақстан Республикасы Қауіпсіздік кеңесінің мүшесі. Қазіргі қызметінде 2007 жылдан бастап істейді.
3-ші, 2-ші дәрежелі «Барыс», «Құрмет белгісі» ордендерімен және медальдармен марапатталған.
МАУСЫМНЫҢ 16-СЫ, СЕЙСЕНБІЕСТЕ ҚАЛАР ОҚИҒАЛАР16 жыл бұрын (1993) Қазақстан Республикасы Президенті жанынан Қазақстанның стратегиялық зерттеулер институты құрылды. Аталмыш институт Қазақстан Республикасы Президенті Әкімшілігінің басшылығымен жұмыс істейді.16 жыл бұрын (1993) Елбасы Н.Назарбаевтың «Үндістан Республикасында Қазақстан Республикасының Елшілігін ашу туралы» және «Қазақстан Республикасы Мүгедектерінің күнін бекіту туралы» Жарлықтары жарық көрді.9 жыл бұрын (2000) Астанаға «Қалалар ? бейбітшілік үшін» ЮНЕСКО сыйлығының сертификаты табыс етілді.ЕСІМДЕР115 жыл бұрын (1894-1981) химия ғылымының докторы, профессор, Қазақстан Ғылым академиясының академигі, Қазақстанның және Өзбекстанның еңбек сіңірген ғылым қайраткері УСАНОВИЧ Михаил Ильич дүниеге келді.
Украинаның Житомир қаласында туған. Киев университетін бітірген. 1920-1929 жылдары Киев қаласындағы Химия-фармацевтика зауытында басшылық қызметте, сонымен қатар политехникалық институтта оқытушы болды. 1929-1943 жылдары Томск университетінің, Орта Азия (Ташкент) университетінің кафедра меңгерушісі қызметін атқарды. 1944 жылдан Қазақ мемлекеттік университетінің кафедра меңгерушісі болып істеді.
Ғалымның негізгі ғылыми еңбектері ерітінділер теориясына арналған. М.Усанович ? «Қышқылдар мен негіздердің Усанович теориясының» авторы. Оның 300-ден астам ғылыми еңбегі жарық көрген.
3 мәрте «Еңбек Қызыл Ту» орденімен, медальдармен марапатталған. 90 жыл бұрын (1919) әнші, Қазақстанның халық әртісі, Ресейдің еңбек сіңірген әртісі АНДРЕЕВА Ольга Давыдовна дүниеге келді.
Ресейдің Санкт-Петербор қаласында туған. Ленинград (қазіргі Санкт-Петербор) консерваториясының фортепьяно, вокал факультетін бітірген. Ол 1961 жылы Кеңес мәдениет қызметкерлерін Қазақстанда тың және тыңайған жерлерді игерушілер арасында әуесқойлар ұжымдарын ұйымдастырып, жандандыруға шақырды. «Целинник» ән-би ансамблін (қазіргі Астана) ұйымдастырып, 1962-1965 жылдары оның көркемдік жағын басқарды. 1965 жылдан Санкт-Петербор қаласында тұрып, қызмет етті. 80 жыл бұрын (1929) филология ғылымының докторы, профессор, Қазақстан Республикасы Әлеуметтік ғылымдар академиясының академигі НҰРМҰҚАНОВ Хайролла Мырзағалиұлы дүниеге келді.
Батыс Қазақстан облысында туған. Орал педагогикалық институтын және Қазақ мемлекеттік университетін сырттай оқып бітірген. Еңбек жолын орта мектептің мұғалімі болып бастаған. 1963 жылдан Қарағанды педагогикалық институтының оқытушысы, кафедра меңгерушісі, деканның орынбасары, деканы қызметтерін атқарған.
Ғалымның 50-ден аса ғылыми еңбегі, оның ішінде «Сөз және шеберлік» атты монографиясы жарық көрген.
МАУСЫМНЫҢ 17-СІ, СӘРСЕНБІБүкілдүниежүзілік қуаңшылық пен шөлейттенуге қарсы күрес күні. 1994 жылы Парижде шөлейттенуге қарсы күрес жөніндегі Халықаралық конвенция қабылданған күннен бастап атап өтіледі.Исландия Республикасының Ұлттық мейрамы ? Тәуелсіздік күні (1944). Солтүстік Еуропада Атлант мұхитындағы Исланд аралдарында орналасқан мемлекет. Ел аумағы әкімшілік жағынан 8 аймаққа, 23 ауданға бөлінеді. Астанасы ? Рейкьявик қаласы. Ресми тілі ? исланд тілі. Ұлттық ақша бірлігі ? исланд кронасы. Исландия парламенттік республика. 1944 жылы қабылданған Конституциясы бойынша мемлекет басшысы Президент 4 жылға ашық сайлау арқылы сайланады. Заң шығару билігін Президент пен бір палаталы парламент Альтинг жүзеге асырады.ЕСТЕ ҚАЛАР ОҚИҒАЛАР17 жыл бұрын (1992) «Ана тілі» баспасы Ахмет Байтұрсынұлының «Тіл тағлымы» атты кітабын жарыққа шығарды. 17 жыл бұрын (1992) Қостанай облысы Комсомол ауданының атауы Қарабалық болып өзгертілді. 16 жыл бұрын (1993) Қазақстан Республикасы Президентінің Жарлығымен Қазақстан Республикасы Ұлттық қауіпсіздік комитетінің Әскери институты құрылды.11 жыл бұрын (1998) Оңтүстік Қазақстан облыстық филармониясы үйі алдында композитор, Қазақстанның халық әртісі, Шымкент, Тараз, Жетісай қалаларының құрметті азаматы Шәмші Қалдаяқов ескерткішінің ашылу салтанаты болды.6 жыл бұрын (2003) Астанада «Думан» ойын-сауық орталығының ашылу салтанаты өтті. ЕСІМДЕР80 жыл бұрын (1929) медицина ғылымының докторы, профессор, Қазақстан Мемлекеттік сыйлығының лауреаты СУХОДОЕВА Галина Савельевна дүниеге келді.
Қазан мемлекеттік медицина институтын, Қазақстан Ғылым академиясы Өлкелік патология институтының аспирантурасын бітірген. 1963 жылдан Қазақстан Денсаулық сақтау министрлігі Өлкелік патология ғылыми-зерттеу институтының, Эпидемиология, микробиология және жұқпалы аурулар ғылыми-зерттеу институтының зертхана меңгерушісі қызметтерін атқарған.
Ғалымның негізгі ғылыми еңбектері микроб әрекетінен туған аллергология және иммунология мәселелеріне арналған. Ол тәжірибе жүзінде түрлі организмдер тудыратын аллергия үлгілерін жинап, бактерия аллергендерін жетілдірді. Оның 2 авторлық куәлігі мен 9 патенті бар.80 жыл бұрын (1929-1984) атақты армян шахматшысы, шахмат журналисі, халықаралық гроссмейстер, шахматтан әлемнің 9-шы чемпионы ПЕТРОСЯН Тигран Вартанович дүниеге келді.60 жыл бұрын (1949) спортшы, жеңіл атлетикадан КСРО спорт шебері, 800, 1500, 3000 метрлік қашықтыққа жүгіруден Қазақстанның бірнеше дүркін чемпионы, халықаралық жарыстардың бірнеше дүркін жеңімпазы КҮРЕНКЕЕВ Бекен Жексенбайұлы дүниеге келді.
Алматы облысының Алакөл ауданында туған. Спортшы Жасөспірімдер арасындағы КСРО біріншілігінің күміс жүлдегері, Жастар арасында КСРО чемпионы, «Правда» газетінің жүлдесі үшін ұйымдастырылған халықаралық жарыстың жеңімпазы атанып, «Сельская жизнь» газетінің жүлдесі үшін ұйымдастырылған бүкілодақтық жарыстың чемпионы атанды. Сонымен қатар Украина, Ресей, Алжир, Франция, Германия, Испания елдерінде өткен халықаралық турнирлерге қатысып жүлделі орындарға ие болды.
МАУСЫМНЫҢ 18-І, БЕЙСЕНБІЕСТЕ ҚАЛАР ОҚИҒАЛАР17 жыл бұрын (1992) КСРО Түркістан әскери округі таратылды.ЕСІМДЕР70 жыл бұрын (1939) ветеринария ғылымының докторы, профессор БИЯШЕВ Қадыр дүниеге келді.
Қ.Бияшев инфекциялы аурудың алдын алу үшін пайдаланылатын биологиялық дәрі-дәрмектің 23 түрін ойлап тауып, өндіріске енгізді. Ол ойлап тапқан дәрі-дәрмектің 10-нан астам түрі Сан-Диего (АҚШ) қаласында өткен «Қазақстан-95» конференция-көрмесіне қойылып, мақтау қағаздарына ие болды. Ғалым ірі қара мен құстардың ішек ауруларының алдын алу жөнінде 170-тен аса ғылыми-әдістемелік еңбек жазды. Ғылыми еңбектері Түркия, Германия, Ресей, Беларус баспасөздерінде жарияланды. 2 авторлық куәлігі, 21 патенті бар.
«Парасат» орденімен, медальдармен марапатталған.60 жыл бұрын (1949) техника ғылымының докторы, профессор ШЫНЫБАЕВ Мақсат Даниярұлы дүниеге келді.
Оңтүстік Қазақстан облысында туған. Қазақ химия-технология институтын бітірген. 1971 жылдан қазіргі Оңтүстік Қазақстан мемлекеттік университетінің кіші ғылыми қызметкері, оқытушысы, аға оқытушысы, доценті, қолданбалы механика кафедрасының профессоры қызметтерін атқарған.
Ғалымның 80-нен астам ғылыми еңбегі, оның ішінде 3 монографиясы, 2 оқулығы жарық көрген. 45 жыл бұрын (1964) «Қазақстан мемлекеттік-жеке әріптестік орталығы» акционерлік қоғамы басқармасының төрағасы СМАҒҰЛОВ Болат Советұлы дүниеге келді.
Қарағанды облысында туған. Қарағанды кооперативтік институтын, «Тұран» университетін бітірген. 1992-1998 жылдары жеке кәсіпкерлікпен айналысқан. 1998-2001 жылдары ? Қазақстан Республикасы Кәсіпорындарды қайта құру және тарату агенттігі Астана қаласы бойынша филиалының директоры. 2001-2003 жылдары ? Қазақстан Республикасы Қаржы министрлігінің комитет төрағасының орынбасары. 2003-2006 жылдары ? Қазақстан Республикасы Индустрия және сауда министрлігі Сауда комитетінің төрағасы, Индустрия және сауда вице-министрі. 2006-2008 жылдары ? Астана қаласы әкімінің орынбасары. Қазіргі қызметінде 2008 жылдан бастап істейді.
МАУСЫМНЫҢ 19-Ы, ЖҰМАКуәйт мемлекетінің Ұлттық мейрамы ? Тәуелсіздік күні (1961). Куәйт Батыс Азияда, Арабия түбегінің солтүстік-шығысы мен Парсы шығанағының 9 аралында орналасқан. Астанасы ? Әл-Куәйт. Ресми тілі ? араб тілі. Діні ? исламның сүннит және шиит тармақтары. Ақша бірлігі ? Куәйт динары. Куәйт ? Конституциялы монархия. 1962 жылғы қараша айында қабылданған Конституция бойынша мемлекет басшысы Куәйт әмірі. Заң шығарушы органы ? Ұлттық жиналыс (бір палаталы парламент) 4 жылға сайланған 50 депутаттан және әмір тағайындаған үкіметтің 25 мүшесінен тұрады. Қазақстан Республикасы мен Куәйт мемлекеті арасындағы дипломатиялық қарым-қатынас 1993 жылғы қаңтардың 1-інде орнатылды.ЕСТЕ ҚАЛАР ОҚИҒАЛАР14 жыл бұрын (1995) Бейжің қаласында Абай күндері басталды.12 жыл бұрын (1997) «Шағын кәсіпкерлікті мемлекеттік қолдау туралы» Қазақстан Республикасының Заңы қабылданды.8 жыл бұрын (2001) Қазақстанда 184,5 шақырымдық Ақсу-Дегелең темір жолы іске қосылды.3 жыл бұрын (2006) Қазақстан инвестициялық қорының «Investfunds.kz» деп аталатын жаңа сайты іске қосылды.ЕСІМДЕР125 жыл бұрын (1884-1976) қазақтың әйгілі халық ақыны, әнші, композитор, Қазақстанның еңбек сіңірген өнер қайраткері ӘЗІРБАЕВ Кенен дүниеге келді.
Жамбыл облысының Қордай ауданында туған. К.Әзірбаев ? қазақ өнеріндегі сал-серілік және айтыскерлік дәстүрлерді үзбей, ХХ ғасырдың 70-жылдарына дейін жеткізген өнерпаз. Әкесі Әзірбай, шешесі Ұлдар да әнші, домбырашы еді. Ән-жырды әуелі ата-анасынан үйренген Кенен 11 жасынан домбыраға қосылып, өз жанынан өлең, ән шығара бастады. «Бозторғай», «Көкшолақ», «Бұлбұл», «Он алтыншы жыл», «Қайран елім», «Аттан» әндерін шығарып, «Әли батыр», «Қырғызбай» дастандарын жырлады. Қазақ, қырғыз арасындағы белгілі жиындарға қатысып, айтысқа түсті, ән сайысына араласты. Мемлекет қайраткерлері О.Жандосов, Ж.Бәрібаев, Т.Бокин, тағы басқалармен таныс-біліс болды. Ұлы Отан соғысы жылдарында мәдени-үгіт бригадасын құрып, ел аралап, халқымыздан шыққан батыр ұл-қыздарымыздың ерлігін, жеңісін жырлады. «Біз жеңеміз», «Сүйгенім-ай, күйгенім-ай», «Төрт батыр» сияқты көптеген өлең, жырлар шығарды. 50-70 жылдары бейбіт өмірді, республика табыстарын, замандастарын бейнелейтін өлең, терме, толғау дастандары туды. 150-дей ән толғап, оның өлеңін жазды.
Оның әншілік, композиторлық болашағына әнші-жыршылардың, домбырашы-күйшілердің әсері зор болды. Әсіресе, Жамбыл, Сарыбас, Балуан Шолақ, Шашубай сынды белгілі әнші-ақын, композиторлардан үлгі-өнеге алды. Ақын-композитордың «Бозторғай», «Көкшолақ», «Базар-Назар», тағы басқа әндері халық сүйіп айтатын мәңгілік рухани қазынаға айналды. К.Әзірбаев сондай-ақ Қарағанды кеншілерінің, Балқаш мыс қорытушыларының, Шымкент қорғасыншыларының, Каспий балықшыларының, Түрксіб темір жол құрылысшыларының арасында болып, сол алып құрылыстардың жетістіктерін шабытпен жырлады.
Композитордың ән шығармашылығының негізгі тақырыбы ? ел өмірі. Ол ел өміріндегі маңызды оқиғалар мен тарихи кезеңдерге әрқашан құлақ түріп, оған өз үлесін қосып отырды. Әзірбаевтің композиторлығы жайында Қазақстан өнер зерттеушілері А.Жұбанов, Б.Ерзакович еңбектер жазды.
Әзірбаев айтыс жанрына ерте араласып, Шалипа, Ләтипа, Кенеқожа, Әбдіғали, Бопипа, Есдәулет ақындармен сөз жарысына түсті. Ол қазақ халқының айтыс өнерінің насихатшысы, осы өнерді кейінгі ұрпаққа жеткізуші тәлімгер-ұстаз да бола білді. Оның «Шөпке барғанда», «Құдалар», «Әли батыр», «Қырғызбай», «Кенебай-Кербез», «Бұрынғы өткен батырлар», «Жалғыз қаз», «Жамбыл ? жыр» атты толғау, дастандары бар. Бұл шығармалары ? ақынның эпикалық дәстүрге құрылған көркем дүниелері. К.Әзірбаев халқымыздың ауыз әдебиеті нұсқаларын есінде мол сақтаған, оның айтуынан жазып алынған фольклорлық мұралар Қазақстан Ғылым академиясы М.Әуезов атындағы Әдебиет және өнер институтының Қолжазбалар орталығында сақтаулы.
Ол ? жыр алыбы Жамбылмен жарты ғасырдай бірге жүріп, жаңа дәуірді асқақтата жырлаған замана жырауы. Бұған екі жүзден астам өлең, арнау, толғаулары айғақ. Бұл туындылары әлденеше рет жинақ болып жарияланды.
1984 жылы ақынның 100 жылдық мерекесі өткізілді. Таңдамалы шығармаларының 2 томдығы және «Шырқа, дауысым», орыс тілінде «Песни гор и степей» кітаптары жарық көрді. Деректі кино-телефильмдер түсірілді.
Кенен Әзірбаевтің есімі Жамбыл облысы Қордай ауданындағы Қасық орта мектебіне, Алматы қаласындағы бір көшеге, Жамбыл қаласындағы кинотеатрға берілген. Алматы консерваториясының және Шымкент мәдениет институтының үздік студенттері үшін Әзірбаев атындағы стипендия берілген. Жамбыл облысында ақын ұзақ жылдар бойы тұрған мекен Кенен ауылы атанады. Онда К.Әзірбаевтің мұражай үйі жұмыс істейді.
«Еңбек Қызыл Ту», 2-і мәрте «Ленин», «Құрмет белгісі» ордендерімен марапатталған.
МАУСЫМНЫҢ 20-СЫ, СЕНБІБүкіләлемдік босқындар күні. БҰҰ-ның 2000 жылғы желтоқсанның 4-дегі шешімі бойынша Африка босқындарының күнімен қатар атап өтіледі.Аргентинаның мемлекеттік мейрамы ? Байрақ күні. Аргентина Оңтүстік Американың оңтүстік-шығысында орналасқан мемлекет. Батысында Чилимен, солтүстігінде Боливия, Парагваймен, солтүстік-шығысында Бразилия, Уругваймен шектеседі. Әкімшілік жағынан 22 провинцияға, 1 ұлттық территорияға және 1 федералды астаналық округке бөлінеді. Астанасы ? Буэнос-Айрес қаласы. Ресми тілі ? испан тілі, сонымен қатар ағылшын және итальян тілдері де кеңінен қолданылады. Ақша бірлігі ? архентино. Қазақстан Республикасы мен Аргентина арасындағы дипломатиялық қарым-қатынас 1993 жылғы маусымның 25-де орнатылды.ЕСТЕ ҚАЛАР ОҚИҒАЛАР79 жыл бұрын (1930) «Жоғарғы Марианна» көмір қабаты бойынша бірінші Қарағанды шахтасының құрылысы басталды. 79 жыл бұрын (1930) Қарағандыда Үгіт және мәдени жұмыстар жөніндегі жылжымалы театр (қазіргі К.С.Станиславский атындағы драма театры) ашылды. 17 жыл бұрын (1992) Елбасы Н.Назарбаевтың және министрліктер мен ведомствалар өкілдерінің қатысуымен Қазақстан кәсіпкерлерінің алғашқы форумы өтті.17 жыл бұрын (1992) Қазақстан Республикасы Түркі мәдениеті және өнері мәселелері жөніндегі біріккен комитетке кірді. 9 жыл бұрын (2000) Мәскеу үкіметі мен Астана әкімшілігі экономикалық, ғылыми-техникалық және мәдени шараларға байланысты келісімге қол қойды.ЕСІМДЕР90 жыл бұрын (1914-1990) экономика ғылымының докторы, профессор, Қазақстанның еңбек сіңірген ғылым қайраткері, Қазақстан Мемлекеттік сыйлығының лауреаты, Ұлы Отан соғысының ардагері АБДУЛЛИН Вахит Абдуллаұлы дүниеге келді.
Қарағанды облысында туған. Мәскеу қаржы-экономика институтын бітірген. Қазақ мал шаруашылығы ғылыми-зерттеу институтының кіші, аға ғылыми қызметкері, бөлім меңгерушісі қызметтерін атқарған.
Ғалымның ғылыми жұмыстарының негізгі бағыты қой шаруашылығын индустриялық негізге көшіру жағдайында өндірісті, еңбекті және технологияны ұйымдастырудың озық формаларын ғылыми тұрғыда негіздеуге арналған.
«Жауынгерлік Қызыл Ту», «Қызыл Жұлдыз» ордендерімен марапатталған.60 жыл бұрын (1949) техника ғылымының докторы, профессор, Халықаралық ақпараттану академиясының академигі ОСПАНОВА Айман Оспанқызы дүниеге келді.
Шымкент қаласында туған. Қазақ химия-технологиялық институтын, Мәскеу химия машина жасау институтының аспирантурасын бітірген. 1976-1984 жылдары ? Қазақ химия-технология институтының оқытушысы, аға оқытушысы, технологиялық процестерді автоматтандыру кафедрасының меңгерушісі, доценті. 1997-2000 жылдары Оңтүстік Қазақстан мемлекеттік университетінің бағдарламалық қамтамасыз ету кафедрасының меңгерушісі қызметтерін атқарған. 2002 жылдан компьютерлік жүйелер мен желілерді бағдарламалық және ақпараттық қамтамасыз ету кафедрасының профессоры.
А.Оспанованың 60-тан астам ғылыми еңбегі, оның ішінде 2 монографиясы жарық көрген. 55 жыл бұрын (1954) жазушы, сыншы САДЫР Берік дүниеге келді.
Алматы облысында туған. Қазақ мемлекеттік университетін бітірген. Еңбек жолын орта мектептің мұғалімі болып бастаған. «Жас алаш», «Қазақ әдебиеті» газеттерінің аға тілшісі, «Ара-Шмель» журналының техникалық редакторы, фельетоншысы, «Ұлан» газетінің жауапты хатшысы қызметтерін атқарған. Қазір «Егемен Қазақстан» республикалық газетінің аға тілшісі болып істейді.
Қаламгердің тұңғыш сатиралық кітабы «Не десем екен?» деген атпен 1987 жылы жарық көрген. Оның «Арман қанатында», «Кеш жарық», «О несі-ай», «Қосымша ми» әзіл әңгімелер кітабы, «Бірде...», «Күлкі әлемінің күлкісі» аударма кітапшалары басылып шыққан.55 жыл бұрын (1954) Атырау бизнес және құқық колледжінің директоры, Іскер әйелдер қауымдастығы Атырау филиалының төрайымы, геология-минералогия ғылымдарының кандидаты, Қазақстан Республикасы Минералдық ресурстар академиясының академигі ӘЙТИЕВА Нұрлы Телманқызы дүниеге келді.
Атырау қаласында туған. Қазақ политехникалық институтын бітірген. Қазақ геологиялық барлау ғылыми-зерттеу институтының инженері, аға инженері, кіші, аға ғылыми қызметкері зертхана меңгерушісі қызметтерін атқарған. 1986-1993 жылдары ? Қазақ политехникалық институты Атырау филиалының оқытушысы, аға оқытушысы, директордың орынбасары. 1993-2002 жылдары ? Атырау мұнай және газ институтының проректоры, мұнай және газ геологиясы кафедрасының меңгерушісі. 1998-2003 жылдары ? Қазақ экономика және құқық институты Атырау филиалының директоры. Қазіргі қызметінде 2003 жылдан бастап істейді.
«Құрмет белгісі» орденімен марапатталған.
МАУСЫМНЫҢ 21-І, ЖЕКСЕНБІМедицина қызметкері күні. Қазақстан Республикасының Президенті Нұрсұлтан Назарбаевтың 2003 жылғы қарашаның 15-індегі Жарлығына сәйкес жыл сайын маусым айының үшінші жексенбісінде атап өтіледі.Жазғы күн тоқырауы. Дәл осы күні Солтүстік жарты шарда ең ұзақ күн болса, Оңтүстік жарты шарда ең қысқа күн болады.Канаданың байырғы тұрғындарының күні. 1996 жылғы маусымның 13-де Канаданың генерал-губернаторы Ромо Ле Блан маусымның 21-ін байырғы тұрғындар күні деп жариялады.Музыка мерекесі. Францияда, ең алғаш рет 1982 жылы маусымның 21-нен 22-не қараған түні музыка мерекесі өтті. Бұл күні барлық кәсіпқой музыканттар мен музыка өнеріне енді араласып жүргендер жиналып, Францияның барлық қалаларында қайырымдылық концерттерін өткізеді. Қазір Музыка мерекесі халықаралық мәртебеге ие және маусымның 21-де 5 құрлықтағы 100 мемлекетте атап өтіледі.ЕСТЕ ҚАЛАР ОҚИҒАЛАР91 жыл бұрын (1918) қазіргі Алматы облыстық «Жетісу» газетінің алғашқы саны жарық көрді.15 жыл бұрын (1994) Қазақстан Республикасы Министрлер Кабинеті қаулысымен Ақмола, Атырау, Павлодар, Талдықорған облыстарында аймақтық университеттер құрылды.13 жыл бұрын (1996) Оңтүстік Кореяда Абайдың қара сөздері корей тілінде кітап болып басылып шықты.12 жыл бұрын (1997) Будапештте венгр тілінде шыққан Қазақстан Президенті Н.Ә.Назарбаевтың «Ғасырлар тоғысында» кітабының тұсаукесері өткізілді. Оның алғы сөзін Венгрия Президенті Арпад Генц жазған.8 жыл бұрын (2001) Қостанай қаласындағы Октябрьдің 50 жылдығы көшесіне Алаш қозғалысының қайраткері, жазушы, ақын, драматург, журналист, 20-шы ғасырдың бас кезіндегі қазақ мәдениеті мен әдебиетінің ірі өкілі Міржақып Дулатовтың есімі беріліп, ескерткіш тақта орнатылды.3 жыл бұрын (2006) Ақтөбе облыстық мәслихатының 25-ші сессиясында «Ақтөбе облысына еңбек сіңірген қайраткер» атағы бекітілді. Арнайы комиссияның шешімі бойынша бұл атақ жыл сайын Ақтөбе облысының дамуына айтулы үлес қосқан үш ақтөбелікке тағайындалады. Бұл атаққа жұртшылық өкілдерінің, үкіметтік ұйым өкілдерінің, т.б. кандидатуралары ұсынылады. Құрметті атаққа лайықты кандидаттардың алғашқылары - Ресей батыры, ұшқыш-ғарышкер, ақтөбелік Юрий Лончаков, еңбек сіңірген қайраткер, ардагер Сапар Сағынтаев және неміс ұлттық-мәдени орталығының жетекшісі Вальтер Мемле деп танылды.ЕСІМДЕР60 жыл бұрын (1949) суретші, Қазақстан Республикасы Суретшілер одағының мүшесі, Қазақстанның еңбек сіңірген өнер қайраткері БАЙТЕНОВ Мәжит Садықұлы дүниеге келді.
Алматы көркемсурет училищесін, Қарағанды мемлекеттік университетін бітірген. Ол бірқатар халықаралық, бүкілодақтық, республикалық көрмелерге қатысқан. Оның туындылары Ә.Қастеев атындағы, Ж.Шарденов атындағы көркемсурет мұражайларында, Астанадағы, Қарағандыдағы, Павлодардағы Мәдениет министрлігінің көрме дирекциясында сақтаулы. М.Байтенов тарихты, түркі халқының салт-дәстүрінен хабардарлығының арқасында өзінің туындыларында сол деректерді кеңінен қолданады. Мысалы, оның көптеген картиналарында Тамғалы тастағы бұқаның суреті салынған. Сондай-ақ қылқалам шебері ауыл тақырыбында жиі қозғайды. Алайда оның шығармашылығының бір ерекшелігі ол өз кескіндемелерін авангардтық, абстрактілі стильде салады.55 жыл бұрын (1954) Қарағанды мемлекеттік медицина академиясының ректоры, медицина ғылымының докторы, профессор, Қазақстан Республикасы Ұлттық ғылым академиясының академигі ҚҰЛМАҒАМБЕТОВ Ілияс Райханұлы дүниеге келді.
Қарағанды қаласында туған. Алматы мемлекеттік медицина институтын, КСРО Денсаулық сақтау министрлігі Трансплантология және жасанды органдар ғылыми-зерттеу институтының аспирантурасын, КСРО Медицина ғылымдары академиясы А.Вишневский атындағы Хирургия институтының докторантурасын бітірген. 1988-2001 жылдары Алматы мемлекеттік медицина институтының курс жетекшісі, кафедра меңгерушісі қызметтерін атқарған. Қазіргі қызметінде 2001 жылдан бастап істейді.
Ғалымның 150-ден астам ғылыми жарияланымы, оның ішінде 6 монографиясы жарық көрген.
