Қазақстан банктері 592 млрд теңге пайда тапты
АСТАНА. KAZINFORM — 2026 жылғы 1 сәуірдегі жағдай бойынша Қазақстан Республикасының банк секторында екінші деңгейдегі 23 банк бар, оның ішінде 15 банк шетелдік қатысумен, оның ішінде 10 еншілес банк.
Қаржы нарығын реттеу және дамыту агенттігінің баспасөз қызметінің мәліметінше, наурыз айында банк секторының активтері 0,7%-ға өсіп, 70,5 трлн теңгеге жетті. Негізгі өсім несие портфелінің 43,4 трлн теңгеге дейін ұлғаюымен байланысты. Алайда жыл басынан бері активтер 0,3%-ға төмендеген.
Экономикаға берілген кредиттер көлемі де артқан. Наурызда бұл көрсеткіш 0,5%-ға өсіп, 40,3 трлн теңгені құрады. Өсім негізінен халыққа берілген қарыздардың есебінен қамтамасыз етілген. Мәселен, тұтынушылық несиелер 16,9 трлн теңгеге, ал ипотекалық қарыздар 7,1 трлн теңгеге жетті.
Бизнеске берілетін кредиттер де біршама өскенімен, өсім баяу. Шағын және орта бизнеске (ШОБ) берілген қарыздар 7,4 трлн теңгеге дейін ұлғайды. Ал ірі бизнеске берілетін кредиттер керісінше 4,7 трлн теңгеге дейін қысқарған.
Айта кетерлігі, наурыз айында банктер 3,2 трлн теңгеге жаңа несие берген. Бұл өткен жылдың сәйкес кезеңімен салыстырғанда 10,2%-ға көп. Оның ішінде бизнеске берілген жаңа қарыздар 23,4%-ға артқан.
Депозиттер де өсім көрсеткен. Резиденттердің банктердегі салымдары 46,6 трлн теңгеге жетіп, бір айда 1%-ға ұлғайды. Бұл ретте теңгедегі депозиттер көбейіп, ал шетел валютасындағы салымдар азайған. Соның нәтижесінде долларлану деңгейі 19,9%-ға дейін төмендеді.
Сонымен қатар банк секторының тұрақтылығы жоғары деңгейде сақталып отыр. Өтімді активтер 19,7 трлн теңгені немесе жалпы активтердің 27,9%-ын құрайды. Капитал жеткіліктілігі де нормативтерден әлдеқайда жоғары.
Алайда банктердің табыстылығы төмендеген. 2026 жылғы наурыз қорытындысы бойынша таза пайда 592 млрд теңгені құрап, өткен жылмен салыстырғанда 10,8%-ға азайған.
Осыдан бұрын МКК банкроттық рәсімінде азаматтарға қандай шығындар жүктелгенін түсіндірді.
