Қазақстан-Британ сауда-өнеркәсіп кеңесінің тең төрағасы Д.Статтард Қазақстанға сапармен келеді
АСТАНА. Сәуірдің 5-і. ҚазАқпарат /Руслан Ғаббасов/ - Сәуірдің 5-і мен 9-ы аралығында Қазақстан-Британ сауда-өнеркәсіп кеңесінің тең төрағасы Джон Статтард бизнес-делегация құрамымен Қазақстанға сапармен келеді. Бұл туралы бүгін Астанада өткен брифингте ҚР Сыртқы істер министрлігінің баспасөз хатшысы Ілияс Омаров мәлім етті,
деп хабарлайды ҚазАқпарат.
«Сапар барысында Алматы мен Астана қалаларында маңызды кездесулері жоспарланған, оның ішінде министрліктер мен ведомстволардың, сондай-ақ ұлттық компаниялардың басшылықтарымен жүздеспек»,- деді І. Омаров.
«Келіссөздер барысында тараптар ынтымақтастықтың ағымдағы ахуалы мен экономикалық перспективаларын, сонымен қатар Қазақстан-Британ сауда-өнеркәсіп кеңесінің 13-ші отырысында қол жеткізген уағдаластықтардың орындалуын талқылайды және кезекті отырыстың күн тәртібі мен өткізу мерзімін анықтайды», - деді баспасөз хатшысы.
