Қазақстан Дубайдағы ЭКСПО-2020 көрмесіне қатысатынын ресми растады

АСТАНА. ҚазАқпарат - Дубайдағы Қазақстан Елшісі Қайрат Лама Шариф «ЭКСПО 2020 Дубай» Жоғарғы комитетінің төрағасы шейх Ахмед бен Саид әл Мактуммен кездесті. Сонымен қатар ол «ЭКСПО 2020 Дубай» басшылық құрамының бюросына да қатысты.

ҚР Сыртқы істер министрлігі баспасөз қызметінің ақпаратына сәйкес кездесу барысында қазақстандық дипломат Қазақстан Премьер-Министрі Бақытжан Сағынтаевтың атынан БАӘ вице-президенті, премьер-министрі, Дубай басшысы Мұхаммед бен Рашид әл Мактум атына Дубайда өтетін Дүниежүзілік ЭКСПО-2020 көрмесіне ресми қатысатынын растайтын хатты тапсырды.

Әмірлік тарапы Қазақстан Үкіметінің тиісті қаулысымен ҚР Білім және  ғылым вице-министрі Асланбек Әмрин көрменің қазақстандық секциясына бас комиссиар болып тағайындалғанын хабарлады.

Қ. Лама Шариф   «Қазақстанда Астанада өтетін ЭКСПО-2017 көрмесін өткізуде Әмірліктің қолдауын жоғары бағалауда. Осыған байланысты араб тарапына ең ауқымды павильондардың бірі бөлінгенін» атап өтті. 

Шейх Ахмед Қазақстанның Дубайда өтетін ЭКСПО-2020 көрмесіне ресми қатысуын құп алды, бұл шешім екі ел арасындағы бауырлас қатынастардың одан әрі нығаюы мен кеңеюіне ықпал ететінін атап өтті.