Қазақстан халқы Ассамблеясы еліміздегі бейбітшілік пен келісімді нығайтуда үлкен рөл атқарады

ӨБЕ. Тамыздың 30-ы. ҚазАқпарат /Самал Ендібаева/ - «Бүгін біздер референдум бойынша Негізгі заңның қабылданған күнін тойлап отырмыз. Конституция - мемлекеттің Елтаңба, Ту, Әнұран сияқты нышандары», - деді Қазақстан халқы Ассамблеясының мүшесі, Қазақстан корейлері Ассамблеясы Ақтөбе облыстық филиалының төрағасы Константин Цхай.

Қазақстан Конституциясының бүкілхалықтық референдумда қабылданған Франция конституциясымен ұқсас жақтары көп. Ол кезде парламенттік республикаға көңілі қалған Франция халқы басқарудың президенттік нысанына дауыс берді, деп еске алады ақтөбелік К.Цхай.

К.Цхайдың айтуынша, Президент Нұрсұлтан Назарбаевтың күш-жігерінің арқасында Қазақстан барынша дамыған экономикаға қол жеткізіп отыр және әлемдік қауымдастықта өзінің лайықты орнын алды. «Оның бір айғағы Қазақстанның Еуропадағы қауіпсіздік және ынтымақтастық ұйымына 2010 жылы төрағалық етуі болып табылады, мұндай құрмет ТМД елдерінің бірде-біріне көрсетілген жоқ», - деді ол.

«Еліміздегі бейбітшілік пен келісімді нығайтуда үлкен рөл атқаратын Қазақстан халқы Ассамблеясына конституциялық мәртебе берудің маңызы айрықша, бұл біздің қоғамымыздағы басты жетістіктеріміздің бірі, - деп сөзін жалғастырды ол. - Біздер Ақтөбе облысының бұрынғыша аймақтық көшбасшылардың бірі болып қалып отырғанымызға қуаныштымыз».