Қазақстан креативті тауарлар мен қызметтер рейтингінде 65-орынға шықты

АСТАНА. KAZINFORM – Мәдениет және ақпарат министрі Аида Балаева креативті индустрияны цифрландыруға арналған Үкімет отырысында былтыр енгізілген салық жеңілдіктері салаға қалай әсер еткенін баяндады.

- 2024 жылдың ақпан айынан бастап креативті кәсіпкерлерге арналған қолдау шаралары кешені аясында оларға бөлшек салықтың арнайы салық режимі енгізілді. Бұл жүйе іске қосылған 1 жыл ішінде креативті индустрия субъектілерінің саны 15% артты, жұмыспен қамтылғандар саны 15% өсті. Оған қоса, 2024 жылғы Global Innovation Index нәтижелері бойынша «Креативті тауарлар мен қызметтер» көрсеткішінде Қазақстан 93-орыннан 65-орынға көтерілді. «Ұлттық фильмдер өндірісі» көрсеткіші бойынша Қазақстан 60-орыннан 31-орынға жоғарылады, - деді ведомство басшысы.

Аида Балаева «Астана хаб» резиденттеріне арналған жеңілдетілген салық режимі IT сала мен креативті индустрияның өзара тығыз байланысуына жағдай жасағанын мәлім етті.

Еске салсақ, былтыр күзде Қазақстан креативті индустриялардың әлемдік рейтингінде 28 позицияға көтерілгені айтылған еді.