Қазақстан МАЭК-тегі апат салдарынан мұнай өндіру көлемін қысқартады
«Иә, жыл соңына дейін мұнай өндіруге қатысты жоспарлы көлемді қысқарттық. Шамамен 90,5 млн тонна мұнай өндіруіміз қажет болатын. Қазіргі уақытта МАЭК-тегі апаттан бөлек кен орындарында жоспарлы және жоспардан тыс жөндеу жұмыстарының ауқымды көлемі болды. Мұнан бөлек, жөндеу жұмыстарының қосымша көлемімен байланысты мәселе туындады», - деді министр Үкімет отырысынан кейін БАҚ өкілдерінің сауалына орай.
Оның атап өтуінше, қазіргі уақытта электр энергиясындағы шектеулерге байланысты мұнай күніне 12 мың тоннаға кем өндіріліп жатыр.
«Электр энергиясын жеткізудегі шектеулерге байланысты тәулік ішіндегі мұнай өндіру көлемі төмендеді. Шамамен 1,5-2 млн тоннаға. Жыл соңына дейін мұнай өндіру көлемі бойынша болжамды төмендететін шығармыз. Қазіргі уақыттағы жоспарымызға орай жыл қорытындысында мұнай өндіру болжамы 89,4 млн тонна болмақ. Динамиканы қараймыз. Өйткені, кен орындарында жөндеу жұмыстары жалғасуда», - деді Алмасадам Сәтқалиев.