Қазақстан мен Қытай су тасқынымен күресу үшін трансшекаралық өзендер бойынша ақпарат алмасуда

АСТАНА. KAZINFORM - Су ресурстары және ирригация министрлігі су тасқынымен бірлесіп күресу үшін қытайлық әріптестерімен трансшекаралық өзендер бойынша ақпарат алмасуда. 2005 жылдан бері Қазақстан мен ҚХР арасында трансшекаралық өзендердегі табиғи апаттар туралы шұғыл хабарлау туралы Келісім бар.

ҚР Су ресурстары және ирригация министрлігі баспасөз қызметінің хабарлауынша, тараптар бір-біріне су тасқыны, мұз қозғалысы мен құбылыстары туралы ақпарат беруге міндетті. Іле өзеніндегі «Саньдаохэцзы», Ертіс өзеніндегі «Наньвань» және Текес өзеніндегі «Текес» су бекеттерінде бақылау жүргізіледі.

«Министрлік Қытай, Ресей Федерациясы және Орталық Азия елдерінің су ведомстволарымен үнемі байланыста. Барлық трансшекаралық өзендер бойынша ақпарат алмасып отырмыз. Бұл деректер әкімдіктерге және ТЖД-ға беріледі. Гидротехникалық құрылыстарда тәулік бойы кезекшілік ұйымдастырылған. Төтенше жағдай туындаған жағдайда «Қазсушар» және бассейндік инспекциялардың мамандары қажетті іс-шараларды қабылдауға дайын», - деді Су ресурстары және ирригация министрі Нұржан Нұржігітов.

Еске салсақ, наурыз айында Қазақстан мен Қытайдың су ведомстволары алғаш рет су ресурстары саласында өзара түсіністік пен ынтымақтастық туралы Меморандумға қол қойды. Құжат суды ұтымды және тұрақты пайдалану, заманауи технологияларды енгізу, баламалы су көздерін бөлу және оны игеру, сондай-ақ тәжірибе алмасу және бірлесіп маман даярлау бағыттарындағы екіжақты ынтымақтастықты нығайтуды көздейді.

Осыған дейін Қазақстан мен Қытай алғаш рет су ресурстары саласында Меморандумға қол қойғаны туралы хабарлағанбыз.