Қазақстан үш мұнай алпауытын тапсырыстағы «елішілік құндылық» үлесін арттыруға міндеттемек

АСТАНА. KAZINFORM — Қазақстан үш мұнай алпауытын тапсырыстағы «елішілік құндылық» үлесін арттыруға міндеттемек. Бұл туралы Энергетика министрі Ерлан Ақкенженов Үкімет отырысында мәлім етті.

— Тауарлар бойынша Қарашығанақ Петролиум Оперейтинг бойынша елішілік құндылықты 2025 жылғы 18%-дан 2029 жылы 30%-ға дейін, NCOC бойынша 2025 жылғы 17%-дан 2029 жылға қарай 28%-ға дейін ұлғайту көзделген, — деді ол.

Министрдің сөзінше, дәл осындай жұмыс «Теңізшевройл» ЖШС-мен де жүргізіліп жатыр.

— ТШО бойынша елішілік құндылықты дамыту бағдарламасы бүгінгі таңда келісу сатысында, — деді Ерлан Ақкенженов.

Сондай-ақ, бүгінгі отырыста Премьер-министр Бектенов Самұрық-Қазынаның отандық өндірушілерден тауар сатып алу көрсеткішін сынады.