Қазақстанда 100 жастан асқан қанша қария бар

АСТАНА. KAZINFORM — Қазақстанда 100 және одан да үлкенірек жастағы 448 азамат бар. Ең жасы үлкен қазақстандық Ұлытау облысында тұрады, ол 115 жасқа толған туған күнін атап өтті, деп хабарлайды Еңбекмині.

Ведомство мәліметінше, жүз жасқа толғандардың ең көп саны еліміздің ең ірі қаласы Алматыда тұрады, онда 100 және одан жоғары жастағы 58 адам бар.

— Ұзақ өмір сүрушілер саны бойынша екінші орында — Түркістан облысы. Онда 100 жастан асқан 53 адам тұрады. Ал үшінші орында — Алматы облысы, онда 100 жасаған 37 адам бар, — делінген хабарламада.

Ең қарт қазақстандықтардың үштігіне Ұлытау облысының тұрғыны — 115 жас, Павлодар облысы — 113 жас, Жамбыл облысы — 110 жас кірді.

Естеріңізге сала кетейік, жыл сайын бүкіл әлемде, оның ішінде Қазақстанда да 1 қазанда Халықаралық қарттар күні атап өтіледі. Бұл мерекені 1990 жылы 14 желтоқсанда Біріккен Ұлттар Ұйымының Бас Ассамблеясы 45 сессияда жариялады.

Оны өткізудің басты мақсаты — егде жастағы адамдардың мемлекет пен қоғам алдындағы еңбегін құрметтеу және тану, сондай-ақ олардың проблемалары мен қажеттіліктеріне, өмір сүру сапасын арттыру қажеттілігіне назар аудару, оларға жалпыға бірдей қамқорлық көрсету.

Бұдан бұрын Германияда жасы 100-ден асқан адамдардың саны артқанын жазғанбыз.