Қазақстанда ғылыми-зерттеу жұмыстарына жұмсалған шығындар 19% өсті
АСТАНА. KAZINFORM - Ғылыми-зерттеу және тәжірибелік-конструкторлық жұмыстарға (ҒЗТКЖ) жұмсалған шығындар 19% өсіп, 2025 жылы 261,4 млрд теңгені құрады. Бір жыл бұрын ҒЗТКЖ шығындарының көлемі 219,6 млрд теңге болған, деп хабарлайды Ұлттық статистика бюросы.
2025 жылы ҒЗТК жұмыстарына жұмсалған шығындардың басым бөлігі Алматы (113,2 млрд теңге) және Астана қаласында (51,4 млрд теңге) тіркелді. Сондай-ақ айтарлықтай көрсеткіш Маңғыстау (17,1 млрд теңге), Қарағанды (13,2 млрд теңге) және Шығыс Қазақстан облыстарында (12,1 млрд теңге) байқалды.
Ғылым салалары бөлінісінде ҒЗТКЖ-ға жұмсалған ішкі шығындардың ең жоғары үлесі инженерлік әзірлемелер мен технологияларға тиесілі болды – 86,3 млрд теңге, жаратылыстану ғылымдарына – 85,2 млрд теңге және ауыл шаруашылығы ғылымдарына – 30,9 млрд теңге.
2025 жылы ҒЗТК жұмыстарын жүргізген қызметкерлер саны ғылыми дәрежелері бойынша 28,3 мың адамды құрап, 2024 жылмен салыстырғанда 4,5%-ға артқан. Олардың 55,4% – әйелдер.
2025 жылы ҒЗТК жұмыстарын 434 кәсіпорын жүргізген.
Айта кетейік, биыл қазақ су шаруашылығы ғылыми-зерттеу институты төрт гранттық жобаны іске асырып жатыр.
