Қазақстанда қанша заңды тұлғалар бар екені белгілі болды
АСТАНА. 14 ақпан. ҚазАқпарат - 2013 жылғы 1 ақпандағы жағдай бойынша тіркелген заңды тұлғалардың саны 318897 бірлікті құрап, өткен жылғы сәйкес кезеңмен салыстырғанда 5,8% артты, оның ішінде 50 адамнан кем қызметкерлері бар заңды тұлғалардың саны - 302308 болған. Бұл туралы бүгін Статистика агенттігінде өткен брифингте мәлім болды.
Агенттіктің таратқан мәліметтері бойынша, жұмыс істеп тұрған заңды тұлғалардың саны 175543 құрады, оның ішінде 159874 бірлік - шағын кәсіпорындар. Республикадағы тіркелген шағын кәсіпкерлік субъектілерінің саны (заңды тұлғалар) 231036 бірлікті құрады және өткен жылғы тиісті кезеңмен салыстырғанда 6,7% артты.
Сондай-ақ, тұтыну бағаларының индексі 2013 жылғы қаңтарда 2012 жылғы желтоқсанмен салыстырғанда 100,9% құрады. Азық-түлік тауарларына бағалар - 0,5%, азық-түлік емес тауарлар - 0,2%, ақылы қызметтер көрсетуге - 2,2% артты. Өнеркәсіп өнімін өндіруші кәсіпорындар бағалары 2013 жылғы қаңтарда 2012 жылғы желтоқсанмен салыстырғанда 0,3% төмендеді.
