Қазақстанда препараттар еуропалық деңгейде бақыланады
АЛМАТЫ. Қазанның 21-і. ҚазАқпарат /Ербол Тұрымбетов/ - Қазақстанда медициналық биопрепараттар заңмен еуропалық дәрежеде қадағаланады және барлық еуропалық ұстанымдар бойынша жұмыстар жүргізіледі. Бұл туралы Еуропа медицина қауымдастығының сарапшысы, Еуроодақтың биотехнологиялық дәрі-дәрмектер жөніндегі жетекші маманы Хубертус Шеллекенс Алматыда өткен баспасөз мәслихатында мәлімдеді.
Кеше ҚР Денсаулық сақтау министрлігі және ҚР Реттеуші органдары өкілдерімен кездескен еуропалық маман еліміз медицина саласындағы биопрепараттарға сараптамаларды дәл Еуропа елдеріндегідей жүргізетіндігіне көз жеткізгендігін атап өтті. «Мен Еуропада реттеуші органдарда қызмет етемін және биологиялық препараттар қауіпсіздігіне, оның ішінде биосимилярларға қатысты мәселелермен айналысамын. Әрине, Қазақстанда барлық жағдайлар керемет жасалған деп айта алмаймын. Шешімін таппаған күрделі сұрақтар кездеседі. Дегенмен, ондай мәселелер Еуропа елдерінде де бар», - дейді ол.
Оның айтуынша, биосимилярлар ағзадағы әр түрлі факторлармен байланысқа түскенде жағымсыз әсерге ұласуы мүмкін. «Биосимилярлардың көпшілігі адам ағзасында антидене тудырады. Бірақ, көп жағдайда қауіпсіз, себебі олар денеге таралып, сіңіп кетеді. Алайда бұл үлкен тәуекелділік. Сондықтан, оларды қолдануда мейлінше сақ болу қажет», дейді Х. Шелленкс.
Медицина ғылымдарының докторы Хубертус Шеллекенс жоғарыда аталған қазметтерімен қатар, Нидерландының Утрехт университеті инновациялық зерттеулер және медициналық биотехнологиялары фармацевтикалық ғылымдары департаментінің профессоры. Ол сондай-ақ, биологиялық препараттар мен биосимилярлардың еуропалық заңнамасының негізін қалаушы болып табылады.
Еуроодақта биоссимилярлар түсінігі 2001 жылы енгізілген болатын. Соған сай, Еуропа елдерінде емделушілер үшін орын алатын бірқатар тәуекелділіктердің тіркелуіне байланысты заңдылықтар қалыптасқан.
