Қазақстандық миллиардер «Тобыл» футбол клубының бас құрылтайшысы болды
АСТАНА. KAZINFORM – Қостанайлық «Тобыл» футбол клубының жаңа құрылтайшысы пайда болды. Бұл жөнінде клубтың баспасөз қызметі мәлімдеді.
– Президент Қасым-Жомарт Кемелұлы Тоқаевтың футболды коммерцияландыру жөніндегі тапсырмасына сәйкес, ERG Директорлар Кеңесінің төрағасы – Бас атқарушы директоры Ш. Ибрагимов қостанайлық «Тобыл» футбол клубының жаңа бас құрылтайшысы атанады. Мұндай ірі әрі сенімді серіктестің қолдауымен «Тобыл» командасы жаңа жетістіктерге жетуге мүмкіндік алады, - делінген хабарламада.
Айта кетейік, қостанайлық клуб биыл Қазақстан суперкубогын иеленді. Қазақстандық маман Нұрбол Жұмасқалиев жаттықтыратын команда алматылық «Қайратты» пенальтилер сериясында жеңіп, жаңа маусымдағы алғашқы жүлделеріне қол жеткізді.
