Қазақстандық Әли Ахмедов әлемде 25 жасқа дейінгі үздік бокшылар рейтингіне кірді
АСТАНА. ҚазАқпарат - Американың бокс туралы жазатын Standingeightcount.com сайты (pound-for-pound) әлемде 25 жасқа дейінгі үздік 25 боксшының рейтингін жариялады. Бұл туралы Қазақстан кәсіпқой боксының «ВКонтакте» әлеуметтік желісіндегі парақшасына сілтеме жасаған ҚазАқпарат тілшісі хабарлайды.
Хабарламада атап өтілгендей, рейтингтің 24-ші сатысында WBC нұсқасы бойынша жастар арасында бірінші ауыр салмақта әлем чемпионы, қазақстандық боксшы Әли Ахмедовтің (13-0, 10КО) есімі тұр.
«Бірінші ауыр салмақтағы қазақстандық боксшы Әли Ахмедов - әлі күнге дейін бокстың үлкен құпияларының бірі. Оның АҚШ-қа көшуі 2019 жылы осыны өзгертуі тиіс», - деп атап өтілген материалда.
Рейтингтің бірінші үштігіне жапондық Наоя Иноуэ (17-0, 15КО), Америка боксшысы Джервонта Дэвис (20-0, 19КО) және Күншығыс елінің тағы бір өкілі - Косеи Танака (12-0, 7КО) кірген.
Авторы: Серік Сабеков
