Қазақстандық боксшылардың ІВО рейтингіндегі орындары өзгерді
АСТАНА. ҚазАқпарат - Халықаралық бокс ұйымы (ІВО) ай сайынғы рейтингінің жаңа нұсқасы жарияланды, деп хабарлайды Sports.kz.
Оған сәйкес, қазақстандық кей боксшылардың рейтингтегі орындары өзгерді.
Суперауыр салмақтағы Иван Дычко 92-орыннан 94-орынға төмендеді.
Бірінші ауыр салмақ өкілі Бейбіт Шүменов 31-орнын сақтап қалды. Осы дивизиондағы Иса Ақбербаевтың да өткен айдағы 50-ші орны өзгеріссіз қалды.
Жартылай ауыр салмақ санатында Әли Ахмедов 34-орынға шықты. Өткен айда ол рейтингте 36-орында болатын.
Орта салмақ өкілі Мейірім Нұрсұлтанов алты саты жоғарылап, 64-орынға тұрақтады.
Бірінші орта салмақ санатында өнер көрсететін Қанат Ислам бұрынғы тоғызыншы орнын сақтап қалды. Ал Мадияр Әшкеев бұрынғы 99-орнынан 96-орынға көтерілді.
Жартылай орта салмақ өкілі Жанқош Тұраров жеті саты төмен сырғып, 57-орынға тұрақтады. Бахтияр Эюбоевтың да рейтингтегі орны төмендеді. Бір ай бұрын 86-орында болған боксшы қазір 92-орында.
Бірінші жартылай орта салмақта Батыр Жүкембаев үздік отыздықтағы орнын сақтап қалумен қатар, бір саты жоғарылап, 29-орынға шықты. Ал Руслан Мәдиев үш саты көтеріліп, 82-орынға тұрақтады.
Жартылай жеңіл салмақ санатында Бекман Сойлыбаев рейтингтің 50-орнында қалды.
