Қазақстандық теннисші Roland Garros турнирінің үздік сегіздігіне кірді

АСТАНА. Маусымның 1-і. ҚазАқпарат /Гүлнәр Жандағұлова/ - Қазақстандық теннисші Ярослава Шведова Roland Garros турнирінің жартылай финалына шығу жолында әлемнің экс бірінші-ракеткасы Елена Янковичпен күш сынасады,

деп хабарлады Қазақстанның Теннис федерациясының баспасөз қызметінен.

Естеріңізге сала кетейік, Ярослава Шведова Roland Garros турнирінің үздік сегіздігінің қатарына өтіп, отандық теннистің тарихында айды аспанға бір-ақ шығарды. Ярослава 4-ші айналымда австралиялық Ярмила Гротты 6:3, 6:4 есебімен жеңді.

Ширек финалға жетудің өзі Шведоваға оңайға түскен жоқ. Бірінші ойында ол Сара Эрраниді жеңсе (6:1,7:5),екінші айналымда Ярослава әлемнің сегізінші ракеткасы поляк Агнешка Разваньсканы шетке ысырды. Ал 1/8 финалға шығу үшін қазақстандық теннисші ресейлік Алиса Клебанованы 6:2,4:6,6:0 есебімен жеңген еді.