Қазақстандық жас теннисші Үндістанда өткен жарыстың жеңімпазы атанды

АСТАНА. ҚазАқпарат – Үндістанның Дехрадун қаласында 18 жасқа дейінгілер арасында ITF турнирі мәреге жетті, деп хабарлайды ҚазАқпарат тілшісі.

Қазақстан теннис федерациясынан мәлім еткеніндей, қазақстандық жас спортшылар финалда бас жүлдені өзара бөлісті.

Жекелей сында 15 жасар Альбина Кәкенова өзінен бір жас үлкен Анастасия Крымкованы 6:1, 6:4 есебімен жеңіске жетіп, ITF Juniors додасындағы алғашқы титулына қол жеткізді.

Есесіне А.Крымкова жұптық сында финалда Сәтима Төрегенмен бірге А.Кәкенова – Ариана Гогулинадан басым түсті.

Сондай-ақ Бейбіт Жұқаев Швейцарияның Тримбах қаласында өткен ITF турнирінде финалға дейін жетіп, онда Польша өкілі Каспер Жукқа есе жіберді – 4:6, 4:6.

Еске сала кетейік, бұдан бұрын қазақстандық теннисші Бейбіт Жұқаевтың Швейцаридағы турнирдің финалына шыққанын жазған болатынбыз.