Қазақстандық жас теннисшілер әлем чемпионатының іріктеу кезеңін жеңіспен бастады
НҰР-СҰЛТАН. ҚазАқпарат – Үндістанның Нью-Дели қаласында жасөспірімдер арасында Davis Cup кубогының (әлем чемпионаты) іріктеу кезеңі басталды, деп хабарлайды ҚазАқпарат тілшісі.
Қазақстан теннис федерациясы мәлім еткеніндей, Қазақстан құрамасы D тобында Шри-Ланка, Таиланд және Вьетнам командаларымен ойнайды.
Қазақстандық жасөспірімдер бүгін бастапқы кездесуінде Шри-Ланка теннисшілерін жеңді.
Бірінші болып кортқа шыққан Әмір Омарханов Тила Дисиянакимен бәсекенің бірінші партиясында қарсыласына бірде-бір гейм берген жоқ – 6:0. Тартысты өрбіген екінші сет соңында Әмір брейк жасай алды – 7:5.
Екінші ойында Данир Қалдыбеков Вишин Нилавераны 6:3, 6:4 есебімен ұтты.
Жұптық сында Әмір Омарханова Виталий Зацепинмен бірге бір сағаттан сәл астам уақытта В.Нилавера – Лисал Гунитилекені тізе бүктірді – 6:4, 6:4.
Осылайша қазақстандықтар қарсыласынан 3:0 есебімен басым түсті.
Еске сала кетейік, бұдан бұрын Заңғар Нұрланұлының Португалиядағы супер турнирдің финалисі атанғанын, Қазақстанның бірінші ракеткасы әлемдік рейтингіде көтерілгенін жазған болатынбыз.
