Қазақстанның барлық өңірлерінде қолайсыз ауа райы: сейсенбіге дауылды ескерту жарияланды

Астанада түнде 1–3 градус аяз күтіледі. Жел солтүстік-батыстан, батыстан соғады, таңертең және күндіз екпіні 15–20 м/с-қа дейін жетеді.

Ақмола облысының солтүстік-шығысында күннің соңына қарай аздаған жаңбыр мен найзағай күтіледі. Түнде және таңертең облыстың батысы, солтүстігі мен шығысында тұман түседі. Түнде 1–6 градус аяз болады. Жел солтүстік-батыстан, батыстан соғып, солтүстік, шығыс және оңтүстігінде екпіні 15–20 м/с-қа жетеді. Облыстың оңтүстік-шығысында жоғары өрт қаупі сақталады. Көкшетауда да жел күшейеді.

Алматыда түнде кей уақытта қатты жаңбыр жауады, найзағай болады. Іле Алатауы тауларында (Медеу және Бостандық аудандарының таулы аймақтары) түнде жауын-шашын, кейде қатты (жаңбыр, қар), күндіз жаңбыр күтіледі. Жел оңтүстік-батыстан соғып, екпіні 15–20 м/с-қа жетеді.

Алматы облысының оңтүстігінде түнде қатты жаңбыр, таулы аймақтарда қар аралас жауын-шашын күтіледі. Найзағай да болуы мүмкін. Жел оңтүстік-батыстан солтүстік-шығысқа ауысып соғады.

Шымкентте жел солтүстік-шығыстан соғып, екпіні 15–20 м/с болады.

Түркістан облысының таулы аймақтарында күндіз өткінші жаңбыр мен найзағай күтіледі. Жел 15–20 м/с, екпіні 23 м/с-қа дейін жетеді.

Қызылорда облысында шаңды дауыл күтіледі, өңірде жоғары және өте жоғары өрт қаупі сақталады.

Абай облысында түнде 3 градус аяз, тұман және қатты жел болжанған.

Шығыс Қазақстан, Жетісу, Қарағанды, Ұлытау, Ақтөбе, Батыс Қазақстан, Атырау, Қостанай, Солтүстік Қазақстан және Павлодар облыстарында да жаңбыр, найзағай, тұман, аяз, шаңды дауыл және қатты жел сияқты қолайсыз құбылыстар күтіледі. Бірқатар өңірлерде өрт қаупі өте жоғары деңгейде сақталады.

«Қазгидромет» мәліметінше, елдің көптеген аймақтарында желдің екпіні 15–28 м/с-қа дейін күшейіп, ауа райы тұрақсыз болады.

Бұған дейін «Қазгидромет» Ақтөбе қаласының тұрғындарына да ескерту жасаған болатын.

Бұған дейін алдағы күндері антициклон салдарынан ауа температурасы күрт төмендейтінін жаздық.