Қазақстанның әуежайлары әлем бойынша ең қымбат қызмет көрсететін әуежай болып есептеледі - вице-министр А. Бектұров
АСТАНА. 12 қаңтар. ҚазАқпарат /Айдар Оспаналиев/ - Көлік және коммуникация вице-министрі Азат Бектұровтың мәлімдеуінше, Қазақстанның әуежайлары әлем бойынша ең қымбат қызмет көрсететін әуежай болып есептеледі.
Бұл туралы ол бүгін Табиғи монополияларды реттеу агенттігінің кеңейтілген алқа мәжілісінде мәлім етті.
Оның сөзіне қарағанда, мәселенің себебі еліміздің әуежайларындағы қызметтерді пайдаланушылар өте аз. Өз кезегінде бұл әуежайда көрсетілетін қызмет құнын көтеруге мәжбүрлеп отыр. Еуропадан Азияға ұшатын әуе кемелері жол-жөнекей бірнеше әуежай арқылы өтеді де, олардың ең тиімдісіне қонады. Осы орайда еліміздің транзиттік тартымдылығын арттыру үшін шетелдік компанияларға арналып 2010 жылы Қызылорда қаласында әуежайдың құрылысы аяқталды.
"Сондай-ақ Ақтау мен Көкшетаудағы ұшу және қону алаңдарын қайта жөндеу жұмыстары басталды. Ал болашақта көлік инфрақұрылымын дамытуға бағытталған 2010-2014 жылдарға арналған салалық бағдарлама аясында еліміздің өзге де әуежайлары қайта жөнделетін болады",-деді вице-министр.
