Қазақстанның басты жетістігі - елдің «бір команда» қағидасы бойынша дамуы - ресейлік БАҚ
АСТАНА. Шілденің 1-і. ҚазАқпарат /Мұратбек Мақұлбеков/ - Қазақстанның басты жетістігі - елдің «бір команда» қағидасы бойынша дамуы - 130 халық пен 45 діни конфессия тату-тәтті өмір сүріп жатқан ұлысаралық және ұлтаралық төзімділік бірегей моделін құру. Ресейдің «Аргументы недели» газетінде жарияланған «Әркімнің дауысы маңызды» деген мақаласында осындай баға берілген.
Басылым атап өтіп отырғандай, биылғы жылы Қазақстан алғаш рет Мемлекеттік нышандар күнін бүкіл халық болып тойлады.
«Бүгінгі күні Қазақстанның мемлекеттік нышандары бүкіл дүниежүзіне белгілі. Қазақстан - әлемдік қауымдастықтың құрметті мүшесі, 2010 жылы - Еуропадағы қауіпсіздік және ынтымақтастық ұйымының іс жүзіндегі төрағасы, Еуразия экономикалық қауымдастығы мен Кеден одағының «локомотивтерінің» бірі, ал келесі жылы Ислам Конференциясы ұйымына төрағалық етпек», - делінген мақалада.
Газет Қазақстанның бірыңғай экономикалық кеңістік, Еуразиялық одақ, Азиядағы өзара іс-қимыл және сенім шаралары кеңесін құру, Ядролық қаруды таратпау жөніндегі көлбеу және тік жаңа әмбебап шарт жасау жөніндегі бейбіт бастамалары арқылы әлемге танымал болып отырғанын да еске салып өткен.
