Қазақстанның солтүстік-батысында дымқыл қар жауып, оңтүстігінде күн күркіреп, шаң көтерілуі мүмкін
АСТАНА. 20 сәуір. ҚазАқпарат - Қазақстанның солтүстік-батысында дымқыл қар жауып, оңтүстігінде күн күркіреп, шаң көтерілуі және қатты жел соғуы мүмкін, деп хабарлайды ҚР ТЖМ баспасөз қызметі Қазгидромет мәліметтеріне сілтеме жасап.
«Қазақстанның көптеген облыстарының ауа райына ауа ағыстары әсер етіп, республиканың солтүстік-батысында жаңбыр соңы дымқыл қарға айналып, оңтүстіктің кей жерлерінде күн күркіреп, шаң көтерілуі, қатты жел соғуы мүмкін», - делінген ведомство ақпаратында.
Қостанай облысында жылдамдығы секундына 15-20 метрге жететін жел соғады деп күтілуде.
Ақмола, Батыс Қазақстан, Солтүстік Қазақстан, Атырау, Ақтөбе, Қарағанды облыстарының кей жерлерінде жел екпіні секундына 15-23 метрге жетеді.
Жамбыл және Шығыс Қазақстан облысының кей жерлерінде күн күркіреп, секундына 15-20 метрлік жел соғады.
Күндіз Алматы, Қызылорда облыстарының, түнде Оңтүстік Қазақстан облысының жекелеген аудандарында күн күркіреп, екпіні секундына 15-20 метрге жететін жел соғады, ал Қызылорда облысының кей жерлерінде шаң көтеріледі.
Маңғыстау облысының кей жерлерінде жел жылдамдығы секундына 16 метрге жетіп, түнде тұман түседі. Сондай-ақ Павлодар облысында да жел қуаты секундына 18 метрге жетеді.
