Қазақстанның Үкімет басшысы Кеден одағындағы әріптестеріне экономикалық қатерлерге қарсы үйлесімді әрекет ету туралы ұсыныс жасамақшы
ТАНА. 13 қазан. ҚазАқпарат /Қанат Мәметқазыұлы/ - Үкімет басшысы Кәрім Мәсімов Кеден одағындағы әріптестеріне экономикалық қатерлерге қарсы үйлесімді әрекет ету туралы ұсыныс жасамақшы. Бүгін ҚР Парламенті Мәжілісінің жалпы отырысында «2012-2014 жылдарға арналған республикалық бюджет туралы» заң жобасы мақұлдануына байланысты сөйлеген сөзінде Үкімет басшысы Кәрім Мәсімов осылай мәлімдеді.
«Келесі аптада Санкт-Петерборда ТМД-ның, Еуропалық одақтың және Кедендік одақтың Үкімет басшыларының кеңесі өтеді. Осы жиында мен біздің әріптестерімізге, оның ішінде Кеден одағындағы әріптестерімізге біздің алдымызда болуы ықтимал қатерлерге үйлесімді әрекет ету туралы ұсыныс жасағым келеді. Бұл ретте ұсынысты де ең алдымен Қазақстанның ең ірі сауда әріптесі және Кеден одағындағы әріптес ретінде Ресей басшылығына жолдағым келеді», - деді Кәрім Мәсімов.
Премьер-министрдің айтуынша, бұндағы негізгі мәселе екі бағыттан тұрады. Оның бірі - макроэкономикалық тұрақтылық. Екіншіден - жұмыс орындарын құруды қолдау. «Осы екі мәселеге баса назар аударуымыз керек», - деді К. Мәсімов.
