«Қазфлювак» және «Рефлювак» вакциналары ДДҰ-ның талаптарына толығымен жауап береді - С.Мамадалиев
АСТАНА. Желтоқсанның 7-сі. ҚазАқпарат /Құралай Орынбекқызы/ - «Құс» тұмауына қарсы «Қазфлювак», «доңыз» тұмауына қарсы «Рефлювак» вакциналары Дүниежүзілік денсаулық сақтау ұйымының талабына толығымен жауап береді.
Бұл туралы бүгін вакциналарды жасап шығарған ҚР Білім және ғылым министрлігі Биологиялық қауіпсіздік проблемаларының ғылыми-зерттеу институтының директоры, профессор Сейідғаппар Мамадалиев айтты, деп хабарлайды ҚазАқпарат тілшісі.
«Біз алғаш рет медициналық вакциналар жасап шығардық. Сондықтан, осындай дәрі-дәрмектерге ДДҰ-ның қоятын барлық талаптарын мұқият зерттеу қажет болды. Институттың ғалымдары вакцинаны жасап шығару барысында бірқатар нормативтік құжаттарды құрастырды. Оның ішінде 93 стандарттық лабораториялық процедуралар, 4 лабораториялық регламент, 17 әдістеме жасалды. Бүгінде осы технологияға қатысты құжаттар толығымен рәсімделіп болды», - деді профессор.
Сонымен бірге, профессор вакцинаны жасап шығару барысында институттың ғалымдарына ҚР Денсаулық сақтау министрлігінің мамандары мен ресейлік әріптестер үлкен көмек көрсеткендігін атап көрсетті.
