Қазыбек Иса өңірлердің дамуы жөнінде: жаңа облыстардың ашылуы күшті серпін берді
АСТАНА. KAZINFORM – Ұлттық құрылтай жалпыұлттық диалог алаңына айналды. Бұл туралы Парламент Мәжілісінде Президент Қасым-Жомарт Тоқаевтың саяси реформаларын іске асыру тақырыбын талқылау кезінде депутат Қазыбек Иса мәлім етті.
- Елімізді түбегейлі жаңғырту үшін ауқымды реформа бастаған Президент Қасым-Жомарт Тоқаевтың Жолдауынан бері үш жылдың ішінде іргелі өзгерістер жасалды. Жалпыхалықтық референдум арқылы Ата заңға түзетулер енгізілді. Парламенттің ықпалы артып, есеп беретін Үкіметке жауапкершілік жүктелді. Конституциялық сот құрылды. Жаңарған ауыл әкімдерінің 72 пайызының үштен бірі – бұрын мемлекеттік қызметте болмаған жаңа адамдар болғандықтан, жаңа леп келді. Аудандар мен облыстық маңызды қалалардың 45 әкімі сайланды. Ал биылдан бастап барлық аудан әкімдерін халық тікелей сайлайды. Халық сайлаған әкім халық алдында есеп береді, яғни қарқынды қайрат көрсетуге ұмтылады, - деді Қазыбек Иса.
Оның пайымынша, «Әділетті Қазақстанның» бәріне бірдей «Заң мен тәртіп» қағидаты болмаса, қазіргі өзгерістер болмас еді. Дәл осы қағидат Президенттің басты жеңісі саналады.
- Жас ұрпаққа патриоттық тәрбие беруде тамырымыздың тереңдігін, тарихымыздың кемелдігін көрсететін Қазақ хандарының бабасы, Алтын Орданың атасы Жошы хан құрған, Ұлық Ұлыстың негізі қаланғанына 800 жыл толуын мерекелеу ұлттық рухымызды көтеріп кеткен елдік маңызы ерекше зор рухани серпіліс болды. Әлемдегі жер көлемі жағынан ең үлкен, қуаты жағынан ең күшті және ең ұзақ жасаған алып империя Алтын Орданың нағыз мұрагері - Ақордалы Қазақ Елі! Алтын Орда түгілі Алаштың атын айтқызбаған кешегі отыз жыл артта қалып, Жошы ханға Ұлытауда, Алаш көсемдеріне астанадан бастап, көптеген қалаларда асқақтаған ескерткіштері орнатылып жатыр. Бұл істердің барлығы тікелей Мемлекет басшысы Қасым-Жомарт Кемелұлының тікелей пәрменімен іске асырылып келеді, - деді депутат.
Оның сөзіне қарағанда, Мемлекет басшысының бастамасымен құрылған, биыл төртінші рет өтіп, төрт құбыламызды түгендеп жатқан Ұлттық құрылтай жалпыұлттық диалог алаңына айналды. Ұлттық құрылтай - Қазақ тарихындағы елдің ең маңызды мәселелері шешілетін ұлы жиын.
- 2022 жылы жаңадан Абай, Ұлытау және Жетісу облыстары ашылды. Бұл үш облыстың ашылуы осы аймақтардың дамуына күшті серпін берді. Өңірлерге жанданған өмір келді. Енді Мемлекет басшысы кеше Құрылтайда Алаш көсемдері Ахмет Байтұрсынұлы мен Міржақып Дулатұлының өмірге келген тарихи өлкеге баса назар аударып, тұтас Торғай өңірінің дамуына тың серпін беретін ауқымды жобаны жариялады. Астанадан Арқалық, Торғай және Ырғыз арқылы Транскаспий халықаралық көлік дәлізіне тура шығатын автокөлік жолының құрылысы басталады. «Бір тау бір топ киікті асырайды» дегендей, бұл күшті күре жол бір қауым елге жұмыс тауып беретін экономикалық серпін болатыны анық. Сонымен қатар «Түркістан қаласының ерекше мәртебесі туралы» заң қабылданды. Түркістанға ерекше мәртебе беру мәдени бірегейлікті нығайтып, қаланы Түркі әлемінің рухани астанасына айналдырады, - деді Қазыбек Иса.
Еске салсақ, жақында Президент Торғай өңірінің дамуына тың серпін беретін ауқымды жоба туралы айтты.
Бұдан бұрын хабарланғандай, бүгін Парламент Мәжілісінің жалпы отырысында палата төрағасы Ерлан Қошанов «Президент Қасым-Жомарт Тоқаевтың саяси реформаларын іске асыру – мемлекеттік құрылыстың жаңа тарихи кезеңі» атты баяндама жасады.
