ҚазТрансОйл» АҚ мұнай тасымалдау көлемін өткен жылы 3 пайызға арттырды

АСТАНА. 11 қаңтар. ҚазАқпарат - «ҚазТрансОйл» АҚ-ның магистральды мұнай құбырлары жүйесімен 2011 жылғы қаңтар-желтоқсандағы мұнай тасымалдау көлемі іс жүзіндегі деректер бойынша 54 млн. 19 мың тоннаны құрады.

Өткен жылдың сәйкес кезеңімен салыстырғанда, мұнай тасымалдау көлемі 1 млн. 514 мың тоннаға немесе 3 пайызға артты, деп хабарлады компанияның баспасөз қызметінен.

«ҚазТрансОйл» АҚ МҚ жүйесі бойынша жүк айналымы 2011 жылғы 12 айда 34 млрд. 493 млн. тонна-шақырым болды. Былтырғы жылғы осы кезеңімен салыстырғанда бұл көрсеткіш 270 млн. тонна-шақырымға немесе 1 пайызға артты.

2011 жылғы 12 айдың қорытындылары бойынша «Өзен - Атырау - Самара» магистральды мұнай құбырының «Атырау - Самара» учаскесімен мұнай айдау көлемі артып, 15 млн. 427 мың тонна болды. 2010 жылдың осындай кезеңімен салыстырғанда мұнай тасымалдау көлемі 127 мың тоннаға немесе 1 пайызға көбейді.

Қазақстан Республикасы аумағында орналасқан «ТОН-2» мұнай құбыры бөлігімен Ресей мұнайының транзиті 2011 жылғы есепті кезеңнің қорытындылыры бойынша 5 млн. 432 мың тоннаны құрады.

«ҚазТрансОйл» АҚ магистральды мұнай құбырлары жүйесімен Қазақстан Республикасының мұнай өңдеу зауыттарына мұнай тасымалдау көлемі 13 млн. 190 мың тоннаны құрады.