Келесі жылы Павлодарда республикалық және жергілікті БАҚ үшін медиа-үй құрылады
ПАВЛОДАР. 25 желтоқсан. ҚазАқпарат - Жаңа жыл қарсаңында Павлодар облысының әкімі Ерлан Арын жергілікті және республикалық БАҚ өкілдерімен кездесті, деп хабарлады оның баспасөз қызметінен.
Ол журналистерге атқарған жұмыстары, аймақ өмірі жайында объективті және жедел ақпарат таратқандары үшін алғысын білдіріп, қызметте табыстар тіледі.
«Журналистика - бұл мемлекеттік билік пен қоғам арасындағы байланыс, тұрғындарды ақпараттандыру ғана емес, бұл аймақтың рухани, адамгершілік және әлеуметтік-экономикалық дамуына әсер ететін күш», - деп атап өтті Е.Арын. Ол тәжірибеге көкейкесті мәселелерді талқылауды және қоғамдық бақылау институтын енгізуді ұсынды.
Аймақ басшысы ендігі жылы республикалық және аймақтық БАҚ-қа жұмыс істеуге мүмкіндік беретін медиа-холдинг жұмыс істейтінін хабарлады.
Кездесудің барлық қатысушыларына сыйлықтар табыс етілді.
