Кейінгі 10 жылда елімізде АИТВ жұқтырғандар саны 2 есеге артты

АСТАНА. ҚазАқпарат – Соңғы 10 жылдың ішінде Қазақстанда адамның иммун тапшылығы вирусы (АИТВ) инфекциясымен сырқаттанушылық 2 есеге артты. Бұл туралы Үкімет отырысында баяндама жасаған Денсаулық сақтау министрі Ажар Ғиният айтты, деп хабарлайды ҚазАқпарат тілшісі.

«Соңғы 10 жылдың ішінде Қазақстанда адамның иммун тапшылығы вирусының (АИТВ) инфекциясымен сырқаттанушылық 2 есеге артты. Атап айтқанда 2013 жылғы 11,5-тен 2022 жылы 20,3-ке дейін. Жұқтырылған иммун тапшылығының синдромынан (ЖИТС) болатын өлім-жітім көрсеткіші 1,7 есеге төмендеді», - деді Ажар Ғиният.

Министр сөзінше, осыдан екі жыл бұрын Қазақстан 2030 жылға дейінгі иммун тапшылығы синдромын жою және Жаһандық Стратегияның мақсаттарына қол жеткізу жөніндегі міндеттемелерін қабылдаған.

«АИТВ-мен өмір сүретін барлық адамдардың 95%-ы өздерінің мәртебесі туралы білуі керек. Сондай-ақ, олардың 95%-ы емделуі қажет. 95% науқастың емі тиімді болуы маңызды», - деп тоқталды Ажар Ғиният.