ҚХЛ клубтарының бiрi «Қазцинк-Торпедоның» екi шабуылшысын алмақ

АСТАНА. ҚазАқпарат - ҚХЛ-да өнер көрсететiн «Адмирал» клубы Қазақстанның «Қазцинк-Торпедо» командасының екi шабуылшысын байқауға алды, деп хабарлайды Құрлықтық хоккей лигасының ресми сайты.

Александр Волжанкин мен Владимир Жмаев «Адмиралда» сынақ мерзiмiн өткiзедi деп жоспарлануда, осыған орай уақытша келiсiмшартқа қол да қойылған. 2013/2014 ойын маусымында Владивосток қаласының намысын қорғаған аталмыш клуб ҚХЛ-да алғаш рет өнер көрсеттi және Шығыс конференциясында 8-орынға ие болды. Гагарин кубогының 1/8 финалында «Адмирал» кубоктың болашақ жеңiмпазы магнитогорскiлiк «Металлургқа» жол бердi.

Ресейлiк форвард Волжанкин «Қазцинк-Торпедо» сапында 53 ойын өткiзiп, 21 (8+13) ұпай жинады. Ал оның отандасы Жмаев өскемендiк командада 20 матч ойнады және сегiз (5+3) ұпайды қанжығасына iлдi.