Киев Венгрия мен Словакияның электр жеткізуді тоқтату туралы қысымына жауап берді

АСТАНА. KAZINFORM — Украинаның Сыртқы істер министрлігі Венгрия мен Словакия өкілдерінің Украинаға электр энергиясын жеткізуді тоқтатуы мүмкін екені туралы мәлімдемелерін бопсалау деп атап, ультиматумдарды Киевке емес, Кремльге жолдауға кеңес берді, деп хабарлайды ВВС.

«Украина Венгрия мен Словакия Республикасының үкімет басшылығы тарапынан елдеріміз арасындағы энергиямен жабдықтау мәселесіне қатысты айтылған ультиматумдар мен бопсалауды қабылдамайды және айыптайды. Ресейдің Украина энергетикалық инфрақұрылымына жаппай әрі нысаналы соққылар жасап, украиналықтарды қатты аяз кезінде жарықсыз, жылусыз және газсыз қалдыруға тырысып отырған жағдайда мұндай әрекеттер арандатушылық, жауапсыздық саналады», делінген Украинаның сыртқы саяси ведомствосының мәлімдемесінде.

Сондай-ақ бұл қадамның салдары бүкіл өңірдің энергетикалық қауіпсіздігіне де қауіп төндіретіні айтылды.

«Біз Венгрия мен Словакия Республикасының үкіметтерін сындарлы ынтымақтастыққа және жауапты ұстанымға шақырамыз. Ультиматумдарды Кремльге жіберу керек, Киевке емес», деп мәлімдеді Украина СІМ.

Бұған дейін Словакияның премьер-министрі Роберт Фицо егер Киев дүйсенбіге дейін Словакияға ресейлік мұнай транзитін қайта қамтамасыз етпесе, Словакиядан Украинаға электр энергиясын жеткізуді тоқтататынын ескерткен.

Венгрияның премьер-министрі Виктор Орбан да «Дружба» мұнай құбыры арқылы мұнай транзиті қалпына келтірілмесе, Украинаға электр энергиясын жеткізуді тоқтататынын мәлімдеді.

Еске сала кетсек, Еуропалық Одақ Ресеймен, Беларусьпен және Украинамен шекаралас елдерін қолдауды күшейтетінін мәлімдеген еді.