Киоскілер, кеңселер, қоймалар: жалдау бағасы қалай өзгерді

АСТАНА. KAZINFORM — 2025 жылдың IV тоқсанында коммерциялық жылжымайтын мүлікті жалға алу бағасы 2024 жылдың сәйкес кезеңімен салыстырғанда 4,2% өскен, деп хабарлайды Ұлттық статистика бюросының баспасөз қызметі.

Өңірлік бөліністе коммерциялық мүліктің жалдау бағасы Ұлытау облысында 0,2% арзандаса, ең жоғары өсім Астана қаласында тіркелді – 6,8%.

Бағаның ең жоғары өсімі киоскілерді жалға алуда байқалды – өсім 23,1%.

Сондай-ақ фитнес-клубтар мен жаттығу залдарын жалға алу бағасы 8,6%, мейрамханалар бойынша 6,1% өсті.

Дәріханаларды жалға алу құны 5,7%, тұрмыстық қызмет көрсету пункттері мен сервистік үй-жайлар 5,1% қымбаттады.

Сауда жайлары мен әкімшілік-кеңсе мақсатындағы нысандарда жалдау бағасы бірдей өсім көрсетті – әрқайсысы 4,8%-дан.

Қойма жайларын жалға алу ақысы 4%, ал шаштараздар мен сұлулық салондарын жалдау 3,3% артты.

Бұған дейін хабарланғандай, бір жылда баспананы жалға алу құны қалай өзгергені белгілі болды.