Қырғызстан көк бөрі командасы – Көшпенділер ойындарының чемпионы

АСТАНА. KAZINFORM – Қырғызстан көк бөрі командасы дүниежүзілік көшпенділер ойындарының чемпионы атанды.  

Ақтық сында Қазақстан мен Қырғызстан көк бөрі командалары кездескен болатын. Екі команда жеңіс үшін барын салып, ерекше ойын өрнегін көрсетті. Нәтижесінде 10: 4 ұпаймен Қырғызстан командасы көк бөрі ойындарының «алтын» жүлдесін қанжығалады. Қазақстандық шабандоздар көшпенділер ойындарының күміс жүлдегері атанды.

Айта кетейік, кеше қазақстандық шабандоздар Түркияның көк бөрі командасын 15:1 есебімен ұтып, финалға жолдама алған. Ал Қырғызстан командасы жартылай финалда Ресей командасымен кездесіп,11:6 есебімен жеңіске жеткен еді.

Көк бөрі – Қырғыз халқының жауынгерлік ат спорты өнері. Бұл ойынға білекті де жүректі жігіттер менбелді аттар іріктеледі. Жеңіске жету үшін де тұлпар мен спортшының бірлесіп әрекет еткені аса маңызды. Серкені жерден алып үлгерген шабандоз доданы жарып өтіп, оны қарсылас команданың қазандығына салуы керек.