Қырғызстан жаңа судьяларды таңдаудың электронды жүйесін енгізуді жоспарлап отыр

БІШКЕК. KAZINFORM — Қырғызстан президенті Садыр Жапаров сот жүйесіне алдағы үш жылда шешілуі тиіс жаңа міндеттер қойды, деп хабарлайды Kazinform меншікті тілшісі.

Қырғызстан судьяларының XIII съезінде президент Садыр Жапаров сот билігі саяси ықпал мен сыртқы қысымнан тәуелсіз болуы керек деп баса айтты. Оның айтуынша, жұмыстың ашықтығын қамтамасыз ету және сыбайлас жемқорлық тәуекелдерін азайту үшін елде жаңа судьяларды іріктеу жүйесін жедел түрде жетілдіру қажет.

— Бас қалаға еліміздің түкпір-түкпірінен амалсыз келуге мәжбүр болған азаматтардың қаржылық және уақыт шығындарын азайтатын құжаттарды тапсырудың электронды жүйесін енгізу қажет. Судьяларды іріктеу процесін жеделдететін, оның нақтылығы мен әділдігін қамтамасыз ететін деректерді өңдеудің автоматтандырылған механизмін іске қосу. Жаңадан тағайындалған судьялардың кәсіби даярлығына қатысты көптеген мәселелерді шешуге мүмкіндік беретін судьялыққа кандидаттардың кадрлық резервін құру — деп тапсырды ол.

Садыр Жапаров сондай-ақ мемлекеттік бағдарлама аясында жеке сот орындаушылар институтын енгізу жоспарларына тоқталды. Ол сот жүйесі судьялардың тәуелсіздігін нығайтуға, сот төрелігінің тиімділігін арттыруға және сот органдары жұмысының ашықтығын қамтамасыз етуге бағытталған заңнамалық бастамаларды қажет ететінін атап өтті. Осыған байланысты Қырғыз Республикасының Президенті Жоғарғы Сотты заң шығару бастамасы құқығын белсендірек пайдалануға шақырды.

Бұған дейін Қырғызстанда Парламент құрудың жаңа тетігі қарастырылып жатқанын жазған болатынбыз.

Кеше Қырғызстанда ақ қалпақ және ұлттық киім күні аталып өтті.