Қырғызстанда қалалық кеңештер сайлауына қатысты сайлауалды үгіт-насихат жұмыстары басталды
БІШКЕК. KAZINFORM – Қырғызстанда 18 қазанда 33 қалада жергілікті кеңештер депутаттарын сайлауға қатысты сайлауалды үгіт-насихат жұмыстары басталды.
Қырғызстан Республикасы ОСК мәліметінше, алдағы жергілікті кеңештер сайлауына қатысу үшін 39 саяси партия тіркелді, олар қалалық кеңештер сайлауына өз кандидаттарының 187 партиялық тізімін ұсынған. Барлығы 4928 кандидат тіркелді, оның 3183-і ер адам және 1745-і әйелдер, бұл 35,41 %.
Атап өтілгендей, 2024 жылғы 18 қазаннан бастап қалалық кеңештер депутаттығына кандидаттар, партияның уәкілетті өкілдері, сенім білдірілген тұлғалар, саяси партиялардың мүшелері және басқа да мүдделі азаматтар кандидаттарды (немесе кандидаттар тізімін) жақтап немесе оларға қарсы дауыс беру мақсатында сайлаушыларды ынталандыруға бағытталған ақпаратты дайындау және тарату жөніндегі қызметпен айналысуға, кандидаттар мен саяси партиялардың сайлауалды бағдарламаларын еркін және жан-жақты талқылауға құқылы. Бұл ретте басты талап үгіт-насихат жүргізу нысандары мен әдістері сайлау заңнамасының талаптарымен сәйкес болуы керек.
Еске сала кетсек, 2024 жылдың 17 қарашасында Қырғызстанда жергілікті кеңештер, сондай-ақ Бішкек пен Ош қалаларының депутаттарын сайлау өтеді. Қырғызстан президенті Садыр Жапаров 17 қарашада өтетін жергілікті кеңес депутаттарының сайлауына байланысты халыққа үндеу жолдады.
Бұған дейін Қырғызстан Ұлттық қауіпсіздік мемлекеттік комитетінің төрағасы Қамчыбек Ташиев жергілікті кеңештер депутаттығына үміткерлердің әрқайсысының қылмысқа және сыбайлас жемқорлыққа қатысы бар-жоғын мұқият тексеруді тапсырды.
