Қырғызстанда қарақұйрық популяциясы қалпына келтіріліп жатыр

АСТАНА. KAZINFORM — Ыстықкөл өңірінде «Арғали», «Ілбіс Қоры» қоғамдық қорлары және «Гүлістан» шаруашылығы «Жейрен-Ордо» жобасын іске асыруды бастады, деп хабарлайды Kazinform тілшісі.

Бұл жоба қарақұйрық популяциясын қалпына келтіруге бағытталған.

Олардың мәліметінше, браконьерлік және табиғи аумақтардың өзгеруі салдарынан қарақұйрықтар жойылу қаупінде тұр. Олардың саны мен таралу аймағы өте төмен деңгейге дейін азайып кеткен. Қазір адамның көмегінсіз популяцияны табиғи жолмен қалпына келтіру мүмкін болмай отыр.

Ыстықкөлдің оңтүстік жағалауы — табиғи жағдайлары қолайлы аумақ. Дегенмен мұнда қарақұйрықтардың қарасы көрінбегеніне көп уақыт болды. Популяцияны қалпына келтірудің жалғыз жолы — реинтродукция, яғни басқа аймақтардан жануарларды әкелу.

«Жейрен-Ордо» жобасында қарақұйрықтар табиғи ортаға «жұмсақ әдіспен» шығарылады. Жобаның бастапқы кезеңінде жануарлар бейімделу және көбею үшін жартылай еркін түрде қамқорлыққа алынады, кейін олар бұрын мекендеген жерлеріне жіберіледі. Қазір орталықта 43 қарақұйрық бар, ал жыл соңына дейін олардың санын 60-қа жеткізу жоспарда бар. Биыл 25 қарақұйрық алғаш рет жабайы табиғатқа жіберіледі: алдымен 12 еркек, содан кейін олар бейімделгеннен кейін 13 ұрғашы мен олардың төлдері.

Алдағы уақытта жоба ұйымдастырушылары жыл сайын 15–20 қарақұйрықты жабайы табиғатқа шығаруды жоспарлап отыр. Браконьерлікті тиісті дәрежеде бақылаған жағдайда жоба бойынша 10 жыл ішінде аймақтағы қарақұйрықтар саны 500-ге дейін арттырылады.

Осыған дейін Жетісуда орманшылар Қызыл кітапқа енген қарақұйрықтарды аулағаны үшін сотталғанын жазғанбыз.