Қырғызстанда Парламент құрудың жаңа тетігі қарастырылып жатыр

АСТАНА. KAZINFORM -  Қырғызстанда Жогорку Кенеш депутаттарын сайлау рәсімін өзгерту ұсынылады, деп хабарлайды Kazinform агенттігінің меншікті тілшісі.

Заңның тиісті жобасын Қырғызстан парламенті депутаттарының тобы қоғамдық талқылауға енгізді. 

Бұл құжат Жогорку Кенеш (ЖК) депутаттарын сайлау рәсімін жетілдіру, саяси сыбайлас жемқорлықтың алдын алу, қолданыстағы сайлау жүйесінің кемшіліктерін жою, сондай-ақ азаматтардың халық қалаулыларына деген сенім деңгейін арттыру мақсатында әзірленді.

Түзетулерге сәйкес, Қырғыз Республикасы Жогорку Кенешінің депутаттарын сайлау үшін 30 көп мандатты аумақтық сайлау округін құру ұсынылады, олардың әрқайсысында 3 депутаттан сайланады. Сонымен қатар, парламенттің барлық 90 депутаты мажоритарлық жүйе бойынша сайланады. Қазіргі уақытта Жогорку Кенештің 54 депутаты бірыңғай сайлау округінде пропорционалды жүйе бойынша, ал 36 депутат бір мандатты сайлау округтерінде мажоритарлық жүйе бойынша сайланады.

Көп мандатты аумақтық сайлау округтері бойынша Жогорку Кенеш депутаттығына кандидаттарды ұсыну құқығы саяси партияларға және азаматтардың өзін-өзі ұсынуы арқылы тиесілі.

Саяси партиялар әр көп мандатты аумақтық сайлау округі бойынша Жогорку Кенеш депутаттығына бір кандидатты партия съезінде жасырын дауыс беру арқылы ұсынады. Өзін-өзі ұсыну тәртібімен Жогорку Кенеш депутаттығына кандидат тек бір сайлау округінде ғана ұсыныла алады.

Көп мандатты аумақтық сайлау округтері бойынша Жогорку Кенешке кандидаттарды ұсыну кезінде саяси партия бір жынысты кандидаттардың үлесі 70%-дан аспауын қамтамасыз етуге міндетті.

Өзгерістерге сәйкес, 30 депутаттық мандат әйелдер квотасына тиесілі.

Жогорку Кенеш депутатының өкілеттігі мерзімінен бұрын тоқтатылған жағдайда, оның мандаты тиісті көп мандатты аумақтық сайлау округінде сайлауға қатысқан сайлаушылардың ең көп дауысын алған, сайланған депутаттардан кейінгі келесі кандидатқа беріледі.

Еске салсақ Қырғызстанда жаңа министрлік пен мемлекеттік агенттік құрылған еді.