Қырғызстанда жергілікті кеңештер депутаттығына үміткерлердің әрқайсысы тексеріледі
БІШКЕК. KAZINFORM – Қырғызстан Ұлттық қауіпсіздік мемлекеттік комитетінің төрағасы Қамчыбек Ташиев жергілікті кеңештер депутаттығына үміткерлердің әрқайсысының қылмысқа және сыбайлас жемқорлыққа қатысы бар-жоғын мұқият тексеруді тапсырды.
Арнайы қызмет басшысы Баткен облысында шекарашылармен кездесуде мемлекеттік органдардың сайлау барысына араласпауы керектігін баса айтты.
«Біз мемлекетті әділ басқаруымыз керек. Мемлекеттік органдар, оның ішінде әскери қызметкерлер сайлауға араласпауы керек. Бұрынғыдай болмайды. Әркім өзінің қалаған кандидатын қысымсыз таңдауы тиіс. Біз депутаттардың мемлекетке қызмет етуі үшін таза болуын қамтамасыз етуге тырысамыз. Біз жергілікті кеңештерді, парламентті әділетсіз сайланған, сондай-ақ қылмыс, сыбайлас жемқорлық және бұрын заң бұзған депутаттардан тазарттық. Қазіргі депутаттыққа үміткерлер бүгіннен бастап ойлануы керек. Кандидаттардың әрқайсысын тексеріп, өзі немесе туыстары қылмысқа, ұйымдасқан қылмыстық топтарға және сыбайлас жемқорлыққа қатысы бар адамдарды тізімнен шығару қажет. Дауыстарды сатып алғандар заңға сәйкес қатаң жазаға тартылады. Мемлекетті тазарту сайлаудан басталуы керек», - деп мәлімдеді Қ.Ташиев.
Еске сала кетсек, 2024 жылдың 17 қарашасында Қырғызстанда жергілікті кеңештердің, сондай-ақ Бішкек пен Ош қалалары депутаттарының сайлауы өтеді. ОСК мәліметінше, 39 саяси партия 33 қалалық кеңеш депутаттығына 188 кандидаттың тізімін ұсынған.
