Қырғызстанның Ұлттық банкі есептік мөлшерлемені 9 пайыз деңгейінде қалдырды
АСТАНА.KAZINFORM – Қырғыз Республикасының Ұлттық банкі 2024 жылғы 27 тамызда күшіне енген есептік мөлшерлемені 9 пайыз деңгейінде қалдырды. Бұл туралы Қырғыз Республикасының Ұлттық банкі мәлім етті.
Қырғыз Республикасындағы жылдық инфляция көрсеткіші 3,6% деңгейіне түсіп, төмендегені байқалды. Азық-түлікке тұтынушылық бағаның өсу қарқыны айтарлықтай төмендеді. Азық-түлікке жатпайтын тауарлар мен қызметтер бағасының өсуі біркелкі қарқынмен баяулаған.
Қырғызстандағы экономикалық белсенділік жоғары деңгейде қалып отыр. 2024 жылғы қаңтар-шілдеде ел экономикасының өсімі нақты мәнде 8,7 % -ды құрады. Негізгі капиталға инвестициялар көлемінің өсуі және экономикалық субъектілердің тұтыну белсенділігінің артуы елдің экономикалық дамуын ынталандыруды жалғастыруда. Ішкі сұраныстың кеңеюі тұтынушылық несиелеудің өсуімен және халықтың нақты табысының өсуімен қатар жүреді.
Банк жүйесінің негізгі көрсеткіштері тұрақты болып қалды. Банк секторының өтімділік резерві мен ресурстық базасы экономиканы несиелендірудің кеңеюіне ықпал етеді, олар бірінші кезекте халықтың тұтынушылық қажеттілігіне, сондай-ақ сауда, құрылыс және көлікті қаржыландыруға беріледі.
Қысқа және орта мерзімді перспективада инфляция факторларын бағалауды ескере отырып, Қырғыз Республикасының Ұлттық банкі есептік мөлшерлемені 9 пайыз деңгейінде сақтау туралы шешім қабылдады. Қабылданған шара елдегі баға тұрақтылығын сақтауға және макроэкономикалық тұрақтылықты қамтамасыз ету үшін жағдай жасауға мүмкіндік береді.
