Қырық киіктің етін тиеген көлік: мал өнімдерін тасымалдау ережесі бұзылған

Әлеуметтік желіде тараған көлікке тиелген қырық киіктің етін тасымалдау дерегіне байланысты полиция әкімшілік құқықбұзушылықты анықтады, деп хабарлайды Kazinform.

Ақмола облысы ПД баспасөз қызметінің мәліметінше, қазанның 23-інде полиция қызметкерлері «Астана-Қорғалжын» автожолында 40 киіктің еті тиелген «Jac» көлігін тоқтатқан.

Тексеріс барысында жүргізушінің Қорғалжын ауданы Сабынды ауылында орналасқан «Астана Агропродукт» ет комбинатынан екені анықталды.

- Тасымалдаушы жүкқұжаттардың түпнұсқаларын және «Охотзоопром бойынша» РМҚК мен «Астана Агропродукт» ЖШС арасында жасалған тауарды өткізу/жеткізу шартының электронды көшірмесін ұсынды. Сондай-ақ, Ақмола облысының аумағында киіктердің популяциясын реттеу туралы № 688 Үкімет қаулысы да бары анықталды, - деп түсіндірді ПД баспасөз қызметінен.

Ведомстводан атап өткендей, киіктің етін тасымалдау дерегі Целиноград аудандық полиция бөлімінің ақпаратты есепке алу кітабында тіркелген.

- Тексеру материалдары ҚР ӘҚБтК 406-бабына сәйкес мал өнімдерін тасымалдау ережелерін бұзғаны үшін әкімшілік жауапкершілікке тарту мақсатында ветеринариялық инспекцияға жіберілді, - деп толықтырды ведомстводан.

Айта кетсек, бұдан бұрын Ақмола облысында киіктерден 76,9 мың гектар егістікке зиян келгенін жазған едік.