Қытай канадалық тауарларға қосымша баж салығын енгізді
АСТАНА. KAZINFORM - 8 наурыз күні Қытай үкіметі Канададан әкелінетін бірқатар өнімдерге қосымша баж салығы енгізілетінін жариялады.
Қытай Қаржы министрлігінің ресми сайтында жарияланған хабарламаға сүйенсек, «Кедендік тариф туралы ҚХР заңы» мен халықаралық құқықтың негізгі қағидаларына сәйкес, Қытай тарапы Канададан әкелінетін кейбір тауарларға 20 наурыздан бастап қосымша баж салығын енгізу туралы шешім қабылдады.
Жарияланған тізімге сәйкес: канадалық қышабас майына, күнжараға және асбұршаққа 100% мөлшерінде баж салығы салынады; омар, тоңазытылған таңқы шаян мен басқа да теңіз өнімдеріне, сондай-ақ шошқа етінің барлық түріне 25% баж салығы енгізіледі.
Аталған өнімдерге қосымша баж салығы қолданыстағы кедендік тарифтер негізінде енгізіледі.
Сонымен қатар, қолданыстағы кедендік және салықтық жеңілдіктер өзгеріссіз қалады, алайда қосымша енгізілген баж салығына жеңілдік қарастырылмайды.
Хабарламада Канада үкіметінің 2024 қазан айында Қытайдан импортталатын электрмобильдерге 100%; болат пен алюминий өнімдеріне 25% баж салығын енгізу туралы шешім қабылдағаны тілге алынған. Хабарламада айтылуынша, Дүниежүзілік сауда ұйымының ережелерін өрескел бұзған бұл шаралар протекционизмнің айқын көрінісі ретінде Қытайдың мүддесіне өте ауыр зиян келтірген.
Бұған дейін Қытай Сыртқы істер министрі АҚШ-ты тарифтер мен сауда соғысы саясатын қайта қарауға шақырған болатын.
