Қытайда 120 млн жыл бұрынғы қауырсынды динозаврдың жаңа түрі анықталды
АСТАНА. KAZINFORM — Қытайлық палеонтолог мамандар шамамен 120 млн жыл бұрын өмір сүрген қауырсынды динозаврдың жаңа түрін сипаттады, деп хабарлайды Xinhua.
Бұл жаңалық динозаврлардағы ұшудың шығу тегін және қазіргі құстардың эволюциясын зерттеу үшін жаңа деректер беріп отыр.
Қытайдың солтүстік-шығысындағы Ляонин провинциясында ерекше жақсы сақталған қазба қалдықтары табылды. Қаңқада жануардың бүкіл денесін дерлік жауып тұрған қауырсын іздері анық сақталған.
Зерттеу қорытындысы Vertebrata PalAsiatica журналында жарияланды. Ғалымдар анықталған динозаврдың қазіргі құстармен тығыз байланысты, үлкен артқы аяқ қауырсындары мен ерекше ұзын, желпуіш тәрізді құйрық қауырсындары бар пеннатапторлар тобының жалғыз белгілі өкілі екенін анықтады. Оның құйрығы шамамен 16 қауырсыннан тұрды және сыртқы түрі бойынша тауыс құсына ұқсайтын.
Жаңа түр тероподтар тұқымдасындағы дромеозавларға жатқызылған, оған велоцираптор және микрораптор да кіреді. Зерттеушілердің айтуынша, алдыңғы аяқтары мен арты аяқтары және құйрықтарында жақсы дамыған қауырсындармен үйлесуі бұрын анықталған бірде бір белгілі динозаврда кездеспеген еді.
Ғалымдар бұл ерекшелік динозаврларда ұшудың қалай дамығанын және қазіргі құстардың қалай пайда болғанын түсінудің маңызды кілті деп санайды.
Зерттеу тобының жетекшісі, Қытай Ғылым академиясының академигі Сюй Син жаңа түрге Цзянсу провинциясындағы Чанчжоу қаласының атымен Changzhousaurus sinensis атауын берді. Қала палеонтологияны белсенді түрде насихаттауымен және ғылыми туризмді дамытуымен танымал.
Осыған дейін Аргентинада бұрын ғылымға белгісіз болған динозавр түрі анықталғанын жаздық.
