Қытайда шетелдік инвестицияның нақты көлемі өткен екі айда 20%-ға азайды

АСТАНА. KAZINFORM - Қытайдың Сауда министрлігі жариялаған қаржылық есепке сәйкес, 2025 жылдың қаңтар-ақпан айларында Қытайда шетелдік инвестицияның нақты пайдаланылған құны 1712,1 миллиард юаньға кеміп, өткен жылдың сәйкес кезеңімен салыстырғанда 20,4%-ға азайған.

Белгілі болғандай, қаңтар, ақпан айларында елде шетелдік инвестицияның есебімен құрылған жаңа кәсіпорындардың саны 7574-ке жетіп, сәйкес мезгілдегіден 5,8%-ға артқан.

Салалар бойынша таратып айтар болсақ:

• Өндіріс секторына тартылған нақты шетелдік инвестиция – 478,2 миллиард юань;

• Қызмет көрсету секторына тартылған шетелдік инвестиция – 1204,9 миллиард юань;

• Жоғары технологиялық секторға тартылған шетелдік инвестиция – 524,9 миллиард юань.

Осы ретте, электрондық коммерция саласындағы шетелдік инвестиция 33,5%-ға, биофармацевтика өндірісіндегі шетелдік инвестиция 22,9%-ға, ақылды тұрмыстық техника өндірісіндегі шетелдік инвестиция 40,7%-ға өскен.

Қаржылық есепте көрсетілгендей, Ұлыбритания, Германия және Оңтүстік Корея елдерінен қытайға салынған инвестицияның нақты құны сәйкесінше 87,9%-ға, 54,7%-ға және 45,2%-ға өскен. Бұл көрсеткіштер еркін сауда аймақтары арқылы салынған инвестицияларды да қамтиды.

Қытай Жаңа экономикалық зерттеулер институтының директоры Чжу Кэли шетелдік инвестицияның нақты пайдаланылған құнының төмендеуін жаһандық экономикалық жағдайдың құбылуы, халықаралық капитал ағынының өзгеруі және шетелдік кәсіпорындардың Қытайға бағытталған инвестициялық стратегияларын реттеуі секілді факторлармен байланыстырады. Ол Securities Daily басылымына берген сұхбатында, Қытай шетелдік инвестицияларды көбірек тарту үшін бизнес ортасын одан әрі жақсартып, шетелдік инвесторлардың сенімін қайта нығайтуға құлшынуы қажет деп атап көрсетті.

Осыған дейін Қытайда тағы бір қала халқының саны 10 миллионнан асқаны туралы жаздық.